Kompanitë e sigurimeve dhe ndërmjetësit e tyre do të përballen me detyrime të reja për informimin e klientëve, duke u kërkuar të shpjegojnë qartë jo vetëm rreziqet që mbulon një policë sigurimi, por edhe rastet kur kompania nuk paguan dëmshpërblim.
Ndryshimet parashikohen në projektligjin e ri “Për sigurimin dhe risigurimin”, i cili është hartuar në kuadër të përafrimit të legjislacionit shqiptar me standardet e Bashkimit Evropian për mbrojtjen e konsumatorëve në tregun e sigurimeve.
Sipas nenit 472, përpara lidhjes së kontratës, klientit duhet t’i jepet një dokument i standardizuar ku shpjegohen në mënyrë të thjeshtë dhe të kuptueshme kushtet kryesore të sigurimit.
Dokumenti duhet të përmbajë informacion mbi rreziqet që mbulohen, shumën e sigurimit, përjashtimet nga dëmshpërblimi, mënyrën e pagesës së primit dhe detyrimet që duhet të përmbushë klienti.
Për shembull, në rastin e sigurimit të një banese, konsumatori duhet të informohet paraprakisht nëse polica mbulon dëmet nga zjarri, përmbytjet apo tërmeti, si dhe cilat ngjarje përjashtohen nga mbulimi.
E njëjta logjikë zbatohet edhe për sigurimet e automjeteve, shëndetit dhe produktet e tjera, sipas karakteristikave të kontratës përkatëse.
Dokumenti i informacionit duhet të jetë i shkurtër, i qartë, lehtësisht i lexueshëm dhe në gjuhën shqipe për produktet e ofruara në Shqipëri, sipas kushteve të projektligjit.
Ai duhet të shpjegojë gjithashtu çfarë detyrimesh ka klienti gjatë periudhës së sigurimit, çfarë duhet të bëjë kur kërkon dëmshpërblim dhe në cilat kushte mund të ndërpritet kontrata.
Synimi është që qytetarët të mos njihen me kufizimet e policës vetëm pasi ka ndodhur dëmi dhe kompania refuzon pagesën, por të kenë informacionin e nevojshëm përpara se të vendosin ta blejnë sigurimin.
Transparencë edhe për komisionet e ndërmjetësve
Një tjetër ndryshim i rëndësishëm lidhet me mënyrën se si paguhen agjentët dhe brokerat që u shesin qytetarëve produkte sigurimi.
Neni 471 parashikon që ndërmjetësi të informojë klientin nëse shpërblehet përmes një tarife të paguar drejtpërdrejt nga klienti, një komisioni të përfshirë në çmimin e policës apo formave të tjera të përfitimit ekonomik.
Në rastet kur klienti paguan drejtpërdrejt për shërbimin e ndërmjetësimit, duhet t’i bëhet e ditur edhe shuma e pagesës ose mënyra e llogaritjes së saj.
Ndërmjetësit duhet të deklarojnë gjithashtu nëse punojnë vetëm me një ose disa kompani të caktuara sigurimi dhe nëse kanë lidhje pronësie me shoqëritë, sipas kritereve të përcaktuara në projektligj.
Këto kërkesa synojnë të rrisin transparencën dhe të kufizojnë konfliktet e interesit gjatë shitjes së produkteve të sigurimit.
Projektligji vendos edhe një detyrim tjetër: produkti i sigurimit që i ofrohet klientit duhet të jetë në përputhje me kërkesat dhe nevojat e tij.
Kjo do të thotë se ndërmjetësi nuk duhet të kufizohet vetëm te shitja e policës, por duhet të sqarojë paraprakisht çfarë kërkon klienti dhe t’i japë informacion objektiv për produktin.
Nëse ofrohet këshillim i personalizuar, ndërmjetësi duhet të shpjegojë përse kontrata e rekomanduar është e përshtatshme për nevojat e klientit.
Ndryshimet janë pjesë e reformës së përgjithshme të tregut shqiptar të sigurimeve, e cila përfshin edhe rregulla të reja për kapitalin, administrimin e rrezikut dhe mbikëqyrjen e kompanive nga Autoriteti i Mbikëqyrjes Financiare. /skyweb.al















