Rritja e tensioneve në Lindjen e Mesme dhe në zonën e Gjirit Persik ka sjellë një rritje të fortë të çmimit të karburantit të avionëve, duke detyruar disa kompani ajrore të anulojnë fluturime që nuk konsiderohen më fitimprurëse.
Megjithatë, Komisioni Europian ka sqaruar se pasagjerët vijojnë të gëzojnë të drejtat e tyre të plota dhe kompanitë nuk mund të justifikojnë gjithçka me rritjen e kostove të karburantit.
Sipas udhëzimeve të publikuara nga Brukseli, çmimet e larta të karburantit nuk konsiderohen “rrethana të jashtëzakonshme”, por pjesë e riskut normal të biznesit të një kompanie ajrore.
Kjo do të thotë se nëse një fluturim anulohet sepse linja nuk është më ekonomikisht e leverdishme për shkak të rritjes së çmimit të kerosenit, pasagjerët kanë të drejtë jo vetëm për rimbursim të biletës, por edhe për kompensim shtesë financiar.
Kompensimi varion nga 250 deri në 600 euro, në varësi të distancës së fluturimit.
Përjashtimi i vetëm, sipas Komisionit Europian, do të ishte mungesa fizike e karburantit në aeroport. Në një rast të tillë, kompania duhet gjithsesi të ofrojë rimbursim ose sistemim në një fluturim tjetër, por mund të shmangë pagesën e kompensimit financiar.
Brukseli theksoi gjithashtu se aktualisht nuk ka mungesa konkrete furnizimi me karburant në aeroportet europiane.
Komisioni Europian sqaroi edhe një tjetër element të rëndësishëm për pasagjerët: Asnjë kompani ajrore nuk mund të rrisë në mënyrë retroaktive çmimin e një bilete të blerë më parë për të mbuluar kostot e rritura të karburantit.
Ndërkohë, detyrimi për asistencë ndaj pasagjerëve në aeroport mbetet në fuqi edhe në rastet e situatave të jashtëzakonshme. Kjo përfshin ushqimin, akomodimin dhe ndihmën e nevojshme në rast vonesash apo anulimesh.
Për të menaxhuar situatat e mundshme të furnizimit, Bashkimi Europian ka hapur gjithashtu mundësinë për përdorimin e karburantit amerikan Jet A në aeroportet europiane. /skyweb.al
