Tensionet në Lindjen e Mesme kanë nisur të japin efektet edhe në tregun shqiptar, kryesisht përmes rritjes së kostove të transportit, duke mbajtur në rritje çmimet e ushqimeve dhe produkteve bazë të konsumit.
Shtrenjtimi i karburanteve në tregjet ndërkombëtare po rrit kostot e importit dhe furnizimit, efekt që gradualisht po transmetohet te konsumatori final.
Të dhënat e INSTAT tregojnë se rritja e çmimeve të ushqimeve vijon të godasë drejtpërdrejt buxhetet e familjeve shqiptare.
Në prill, grupi “Ushqime dhe pije joalkoolike” shënoi një rritje prej 1.3%, ndërsa ushqimet në tërësi u rritën me 1.2%.
Ndikimin më të fortë e dhanë peshku dhe produktet e detit, të cilat u shtrenjtuan me 6.5%, duke regjistruar rritjen më të lartë në gjithë grupin ushqimor.
Në rritje mbeten edhe çmimet e mishit, të cilat u zgjeruan me 3.1%.
Sipas INSTAT, mishi i freskët, i ftohur ose i ngrirë rezulton 3.2% më i shtrenjtë krahasuar me një vit më parë.
Edhe vajrat dhe yndyrnat vijojnë të mbeten në nivele të larta, me një rritje prej 3.1%, ndërsa pijet joalkoolike u shtrenjtuan me 2.8%.
Ekspertët e lidhin këtë situatë me rritjen e kostove të transportit dhe energjisë në tregjet globale, pas tensioneve gjeopolitike në Lindjen e Mesme, të cilat kanë ndikuar drejtpërdrejt në zinxhirin e furnizimit dhe në çmimet e importeve.
Nga ana tjetër, disa produkte kanë shfaqur ulje të lehtë çmimesh.
Perimet ranë me 0.7%, ndërsa drithërat dhe produktet me bazë drithërash u ulën me 0.2%.
Rritja e kostove të karburanteve po shihet gjithnjë e më shumë si një faktor kyç që po ushqen presionin mbi çmimet e konsumit, në një moment kur familjet shqiptare vazhdojnë të përballen me kosto të larta jetese. /skyweb.al
