Ministri i Brendshëm, Ervin Demo, dhe Drejtori i Përgjithshëm i Policisë së Shtetit, Skënder Hita, kanë bërë një bilanc të situatës së krijuar në Tiranë gjatë javëve të fundit, në kuadër të protestave.
Gjatë një deklarate për mediat, Demo e cilësoi nivelin e dhunës si “të paprecedentë”, duke theksuar se ngjarjet e fundit kanë përbërë një sfidë të madhe për punonjësit e Policisë së Shtetit.
Sipas ministrit, në total janë regjistruar 347 persona të lënduar, mes tyre 200 punonjës policie, 107 protestues dhe 39 kalimtarë. Në mesin e të lënduarve ka pasur edhe një numër të konsiderueshëm gazetarësh, ndërsa disa persona kanë pësuar dëmtime të rënda.
Gjatë deklaratës, Demo u ndal edhe te nevoja për modernizimin teknologjik të Policisë së Shtetit, duke njoftuar se në një kohë të afërt do të nisë përdorimi i kamerave të trupit nga punonjësit e policisë në Tiranë.
“Fuqizimi teknologjik i Policisë së Shtetit është një domosdoshmëri, ndaj do të punojmë me intensitet për të bërë hapa të shpejtë në këtë drejtim. Një nga elementët e parë është rritja e transparencës së veprimeve përmes kamerave të trupit, të cilat shumë shpejt do të vihen në funksion, duke nisur me punonjësit e Policisë së Shtetit në Bashkinë e Tiranës”, deklaroi Demo.
Sipas tij, pamjet e regjistruara nga kamerat do të ndihmojnë në dokumentimin e akteve të dhunës nga individë të caktuar, si dhe në garantimin e ligjshmërisë së veprimeve të punonjësve të policisë.
Ministri theksoi se përdorimi i kësaj teknologjie synon të rrisë transparencën dhe llogaridhënien gjatë ndërhyrjeve policore, duke siguruar që veprimet e efektivëve të jenë në përputhje me kuadrin ligjor. /skyweb.al
