Kryetari i Bashkisë së Tiranës, Erion Veliaj, ka vendosur lirimin nga detyra të dy nënkryetarëve, Vasilika Vjeros dhe Ilir Mëngra, si dhe emërimin e Etleva Bishës në postin e nënkryetares së Bashkisë së Tiranës.
Etleva Bisha vjen në këtë pozicion me një përvojë të gjatë politike dhe profesionale. Ajo është një nga themelueset e FRESSH-it dhe ka qenë prej vitesh e angazhuar në Partinë Socialiste. Gjithashtu, ka kontribuar në reformimin e shërbimeve sociale gjatë periudhës kur Erion Veliaj drejtonte Ministrinë e Mirëqenies Sociale dhe Rinisë.
Në vitet e fundit, Bisha është angazhuar në fushën e pushtetit vendor, duke bashkëpunuar me organizata të rëndësishme ndërkombëtare që operojnë në Shqipëri dhe duke kontribuar në çështje që lidhen me administrimin dhe zhvillimin e qeverisjes vendore.
Me këtë emërim, Bashkia e Tiranës i beson një prej posteve drejtuese një figure me përvojë në strukturat politike, shërbimet sociale dhe ekspertizë në fushën e pushtetit vendor.
