Për të luftuar korrupsionin, qeveria parashikon të përdorë edhe AI-në. Dokumenti i hedhur për konsultim publik, për Strategjinë Kombëtare për Inteligjencën Artificiale, i kushton një vëmendje të veçantë mënyrës se si do të përdoret kjo teknologji për të parandaluar aktet korruptive.
“Me ndihmën e IA-së, Shqipëria do të zbulojë shpejt rastet e evazionit fiskal dhe krimit financiar. Modeli që është në zhvillim analizon faturat elektronike dhe deklaratat doganore në kohë reale për të identifikuar transaksionet e dyshimta, duke e bërë procesin më efikas dhe duke ulur korrupsionin si dhe kohën e nevojshme për analizë nga punonjësit”.
Korrupsioni qeveritar nuk bëhet vetëm me para nën dorë, por edhe në sistemet e prokurimit. Pavarësisht se një hap është bërë drejt automatizimit të këtyre veprimeve, në dokument thuhet se automatizimi i plotë do të shmangë përzgjedhjet e gabuara.
Qëllimi është arritja e automatizimit të plotë të proceseve të prokurimit përmes një sistemi elektronik të avancuar të drejtuar nga inteligjenca artificiale, duke zëvendësuar dokumentacionin në letër dhe komunikimin fizik me një rrjedhë pune plotësisht digjitale dhe inteligjente.
Strategjia kombëtare e Inteligjencës Artificiale
Dëm në financat publike nuk bën vetëm korrupsioni, por edhe evazioni, ku sipas dokumentit, të dhënat tatimore do të kalojnë në filtrin e inteligjencës artificiale.
”Inteligjenca artificiale do të përdoret për të zbuluar anomali në të dhënat fiskale dhe faturat, duke kontribuar në uljen e evazionit fiskal dhe krimit financiar. Modeli do të analizojë faturat elektronike dhe deklaratat doganore në kohë reale për të identifikuar transaksionet e dyshimta, duke e bërë procesin më efikas dhe duke reduktuar korrupsionin dhe kohën e përpunimit nga punonjësit”.
Dokumenti është ende në fazë konsultimi dhe implementimi i tij kërkon më parë miratimin nga Këshilli i Ministrave./A2
