Kryeministri Edi Rama ka drejtuar mbledhjen e Komitetit Ndërministror të Emergjencave Civile për të analizuar situatën e përmbytjeve të shkaktuara nga reshjet intensive të ditëve të fundit, duke theksuar se fenomeni nuk është i izoluar vetëm në Shqipëri.
Gjatë fjalës së tij, Rama tha se e njëjta situatë e rënduar po ndodh edhe në vende të tjera të rajonit dhe Europës, përfshirë Greqinë dhe Italinë, duke ngritur pyetjen nëse edhe këto vende duhet të shpallin gjendjen e jashtëzakonshme.
Sipas tij, përballë një moti ekstrem, reagimi duhet të jetë i matur dhe i fokusuar te ndihma konkrete për qytetarët.
Kryeministri theksoi se në situata të tilla nuk ka vend për kërkim fajtorësh apo teori, por për solidaritet dhe bashkim forcash. Ai nënvizoi se ndryshimet klimatike po sjellin jo vetëm vera më të nxehta, por edhe reshje më intensive, përmbytje, thatësira dhe zjarre më të shpeshta, duke e cilësuar këtë si realitetin e ri klimatik në të cilin jeton vendi.
Sipas të dhënave të prezantuara në mbledhje, deri në këto momente janë evidentuar 1587 banesa me prezencë uji, ndërsa 51 familje janë evakuuar për arsye sigurie. Rama theksoi se sasia e reshjeve ka qenë jashtëzakonisht e lartë, duke tejkaluar mesataren mujore të shiut në një periudhë shumë të shkurtër kohe.
Ai shtoi se faktorët njerëzorë, si hedhja e mbetjeve dhe dëmtimi i mjedisit, i përkeqësojnë më tej pasojat e motit ekstrem, duke rritur rrezikun nga përmbytjet. Sipas tij, përballja me situatën kërkon durim, koordinim institucional dhe mbështetje për qytetarët e prekur, jo tension dhe retorikë politike.
Mbledhja e Komitetit u fokusua në vlerësimin e situatës në terren, masat e ndërmarra deri tani dhe vijimin e ndërhyrjeve për menaxhimin e emergjencës, ndërsa autoritetet mbeten në gatishmëri për përkeqësime të mundshme të kushteve atmosferike. /skyweb.al
