Kur Presidenti Donald Trump iu përgjigj të hënën thirrjeve në rritje për ngadalësimin e zhvillimit të inteligjencës artificiale (IA), ishte i prerë.
“IA që po merr përsipër botën, po shkatërron njerëzimin dhe të gjitha gjërat e tjera të këqija është NJË MASHRIM,” shkroi ai në rrjetet sociale. Më herët, ai kishte argumentuar se “i vetmi kontroll ose ‘kufizim’ që i nevojitet IA-së” është një president “i fortë dhe i zgjuar”.
Qëndrimi i Trump, siç pritej, nuk ndahet nga demokratët e rangut të lartë në Kongres. Ai kundërshtohet gjithashtu nga figura të rëndësishme të sektorit të IA-së, të cilët ditët e fundit kanë dhënë paralajmërime të forta për sigurinë dhe kanë argumentuar në favor të rregullimit të këtij sektori nga qeveria.
Megjithatë, në SHBA, miratimi i ligjeve të reja për sigurinë e IA-së nuk duket i mundshëm së shpejti.
Çdo projektligj do të duhej të miratohej si nga Dhoma e Përfaqësuesve, ashtu edhe nga Senati, në mënyrë që të bëhej ligj. Kundërshtimi i fortë i Trump ndaj kufizimeve të reja për IA-në e bën të pamundur që Partia Republikane, e cila ka shumicën në të dyja dhomat, të shkëputet nga qëndrimi i tij dhe të mbështesë kufizime apo kontrolle qeveritare.
Edhe nëse kjo do të ndodhte, çdo ligj i miratuar ka shumë gjasa të kërkonte firmën e presidentit për të hyrë në fuqi. Hedhja poshtë nga Trump e nevojës për rregullime të reja të hënën praktikisht i dha fund, të paktën për momentin, çdo shprese për një veprim ekzekutiv.
Dhoma e Përfaqësuesve pritet të hyjë në pushim në fund të kësaj jave dhe të mos rikthehet deri pas zgjedhjeve të mesmandatit në fillim të nëntorit. Disa demokratë të rëndësishëm po kërkojnë që ky pushim të shtyhet, derisa në Dhomë të miratohen masa mbrojtëse për sigurinë e IA-së.
“Kongresi nuk duhet të largohet nga Uashingtoni derisa të bëhet diçka vendimtare për të mbrojtur sigurinë dhe mirëqenien e popullit amerikan,” u tha gazetarëve të hënën udhëheqësi i pakicës demokrate në Dhomën e Përfaqësuesve, Hakeem Jeffries.
Një grup demokratësh të Dhomës së Përfaqësuesve, që kërkojnë më shumë kohë për të diskutuar çështjen, i kanë dërguar gjithashtu një letër kryetarit republikan të Dhomës, Mike Johnson, i cili do të merrte vendimin përfundimtar nëse pushimi do të shtyhej.
“Mendjet e arsyeshme mund të mos bien dakord për mënyrën e saktë se si Kongresi duhet ta rregullojë këtë teknologji që po zhvillohet me shpejtësi,” thanë ata. “Por nuk mund të mos biem dakord për domosdoshmërinë që Kongresi të veprojë.”
Ndërsa demokratët po bëjnë presion për më shumë kohë për të trajtuar sigurinë e IA-së, edhe vetë ata janë të ndarë për mënyrën më të mirë të rregullimit të saj.
Edhe nëse Partia Demokratike do të fitonte kontrollin e të dyja dhomave të Kongresit në zgjedhjet e nëntorit, nuk ka garanci për veprim të shpejtë, pasi do të duhej të bashkohej rreth një propozimi të vetëm.
Ndërkohë, në Capitol Hill ekzistojnë tashmë një sërë propozimesh ligjore që synojnë adresimin e sigurisë së IA-së. Ato variojnë nga kontrolle të pavarura dhe rishikime të sistemeve, deri te krijimi i një “çelësi federal fikjeje” për IA-në, si dhe një moratorium i plotë për qendrat e të dhënave, i propozuar nga senatori Bernie Sanders.
Këto propozime të ndryshme tregojnë mungesën e një konsensusi në Kongres, por gjithashtu edhe urgjencën që disa ligjvënës ndiejnë për të ndërmarrë veprime.
Disa republikanë të rëndësishëm, përfshirë kryetarin e Dhomës së Përfaqësuesve, Johnson, shpesh kanë folur për “vetërregullim” kur diskutojnë veprimet e qeverisë dhe kanë bërë thirrje që kompanitë të marrin vetë përgjegjësinë për sigurinë e IA-së.
Një nga këshilltarët kryesorë të Trump për IA-në, David Sacks, i tha të hënën CBS News, partnerit amerikan të BBC-së, se disa prej paralajmërimeve ekzistenciale nga njerëz brenda industrisë ishin ekzagjeruar.
“Unë mendoj se kjo po kthehet në një panik,” tha ai.
“Para së gjithash, është përgjegjësi e tyre që t’i bëjnë produktet e tyre të sigurta,” tha Sacks. “Ata duhet të na tregojnë se si duhet ta bëjnë këtë. Nëse nuk munden, duhet t’ua lënë vendin njerëzve që mund ta bëjnë.”
“Pse silleni sikur kjo është diçka që nuk mund ta kontrolloni?” tha ai, duke iu referuar drejtuesit të Anthropic, Dario Amodei, i cili ka bërë thirrje për ngadalësimin e zhvillimit.
“Nëse nuk mund ta kontrolloni, atëherë mos e bëni,” përfundoi ai.
