Shqipëria po bëhet një destinacion i ri pune për gratë dhe vajzat nga Azia, të cilat vitet e fundit po zënë një vend gjithnjë e më të dukshëm në tregun e punës.
Sipas të dhënave të INSTAT, në fund të vitit 2024 numri i të huajve me leje qëndrimi arriti në 21.940, duke shënuar një rritje me 2,2 për qind krahasuar me 2023. Ndërkohë, përqindja e grave dhe vajzave ka ardhur në rritje të vazhdueshme, duke përfaqësuar 38,1 për qind të totalit, niveli më i lartë në pesë vitet e fundit.
Ky ndryshim lidhet kryesisht me rritjen e prezencës së shtetaseve filipinase, të cilat po punësohen masivisht në sektorin e shërbimeve. Shumë prej tyre shërbejnë në restorante, hotele dhe bare, ndërsa një pjesë jo e vogël punon pranë familjeve të shtresës së pasur, duke u kujdesur për fëmijët apo duke kryer punë shtëpie. Ky fenomen po bëhet gjithnjë e më i dukshëm në qytetet kryesore, veçanërisht në Tiranë dhe bregdet.
Në total, Azia shënoi një rritje të fortë me 20,1 për qind të të huajve në Shqipëri, ndërkohë që Evropa mbetet kontinent dominues me 65,5 për qind, por ka rënë me 5,6 për qind krahasuar me një vit më parë. Shtetasit nga Kosova, Italia dhe Turqia vazhdojnë të mbajnë vendet e para për numrin e lejeve të qëndrimit, ndërsa India dhe Filipinet janë tashmë mes pesë vendeve kryesore të origjinës së të huajve në Shqipëri.
Punësimi është arsyeja kryesore e qëndrimit: mbi gjysma e të huajve, ose 54,3 për qind, kanë marrë leje qëndrimi për arsye pune.
Kjo shpjegon edhe përse po rritet numri i punëtoreve nga Azia, të cilat përmbushin nevojat e një tregu vendas gjithnjë e më të varur nga forca e huaj e punës.
Ndërkohë, numri i të huajve të parregullt ka rënë ndjeshëm, nga 6.630 raste në vitin 2023 në vetëm 1.540 në vitin 2024, çka tregon një qasje më të ligjshme dhe të kontrolluar ndaj migracionit.
