Gjatë vitit 2024, Shqipëria ka pritur një numër gjithnjë në rritje të shtetasve të huaj që kanë zgjedhur të jetojnë apo punojnë këtu. Në fund të vitit, në vend u regjistruan 21,940 të huaj me leje qëndrimi, një rritje prej 2.2 për qind krahasuar me vitin 2023.
Në listën e shtetësive kryesore që përbëjnë komunitetin e të huajve në Shqipëri, përveç kosovarëve, italianëve dhe turqve, vitet e fundit kanë filluar të spikasin gjithnjë e më shumë indianët dhe filipinasit. Këta dy grupe renditen respektivisht në vendin e katërt dhe të pestë për numrin e lejeve të qëndrimit, duke u shndërruar në një fenomen të ri migrator për Shqipërinë.
Ndryshe nga shtetasit e rajonit, të cilët kanë afërsi gjeografike dhe historike, ardhja e indianëve dhe filipinasve shihet si jo karakteristike, por gjithnjë e më e pranishme, sidomos për shkak të punësimit. Shumica e tyre janë në moshë aktive 30–39 vjeç dhe vijnë kryesisht për të mbushur boshllëqet që ka tregu shqiptar i punës, në sektorë si shërbimet, ndërtimi dhe turizmi.
Statistikat tregojnë se 54.3 për qind e të huajve në Shqipëri kanë marrë leje qëndrimi për arsye pune, ndërsa bashkimi familjar përbën 24.5 për qind të qëllimeve të qëndrimit. Ndërkohë, aplikimet për leje qëndrimi gjatë vitit 2024 janë rritur me 6 për qind krahasuar me një vit më parë, ku një pjesë e konsiderueshme u përkasin pikërisht italianëve dhe indianëve, të cilët së bashku mbajnë gati 29 për qind të totalit.
Prania e shtetasve nga Azia është në rritje të fortë. Në vitin 2024, numri i të huajve nga ky kontinent u rrit me 20.1 për qind, duke reflektuar prirjen që Shqipëria po shndërrohet në një destinacion të ri për punëtorët aziatikë. Filipinasit, të njohur për punën në sektorin e shërbimeve dhe kujdesit familjar, dhe indianët, që shpesh angazhohen në ndërtim apo industri të tjera, po bëhen pjesë e dukshme e tregut shqiptar të punës.
Një tjetër tregues pozitiv është ulja e të huajve të parregullt: gjatë vitit 2024 u identifikuan vetëm 1,540 raste, krahasuar me 6,630 një vit më parë. Kjo tregon se gjithnjë e më shumë të huaj – përfshirë indianë dhe filipinas – po zgjedhin rrugën ligjore për të jetuar dhe punuar në Shqipëri.
Ky trend reflekton ndryshimet që po përjeton tregu shqiptar i punës, i cili për shkak të emigracionit masiv të forcës vendase, po kthehet gjithnjë e më shumë drejt importit të punëtorëve nga Azia.
