Franca do të ndalojë telefonatat e marketingut që bëhen pa pëlqimin paraprak të qytetarëve, duke ashpërsuar ndjeshëm rregullat ndaj call-centerave dhe kompanive të shitjeve. Ligji i ri hyn në fuqi më 11 gusht dhe ndryshon mënyrën se si bizneset mund të kontaktojnë konsumatorët.
Deri tani, qytetarët duhej të regjistroheshin në sisteme të posaçme nëse nuk dëshironin të merrnin telefonata promocionale. Me rregullat e reja ndodh e kundërta: kompania duhet të ketë marrë më parë lejen e qytetarit për ta telefonuar.
Telefonatat do të lejohen vetëm nëse konsumatori ka dhënë pëlqimin, për shembull gjatë një blerjeje apo plotësimit të një formulari, ose kur kontakti lidhet me një kontratë që ai ka tashmë me kompaninë.
Pëlqimi mund të tërhiqet në çdo moment. Qeveria franceze argumenton se masa ishte e nevojshme pasi rreth tre në katër qytetarë marrin të paktën një telefonatë të padëshiruar marketingu çdo javë.
Shkeljet do të ndëshkohen rëndë, me gjoba që mund të arrijnë deri në 75 mijë euro për individët dhe 375 mijë euro për kompanitë.
Ndalimi do të zbatohet pothuajse në të gjithë sektorët dhe synon veçanërisht mbrojtjen e konsumatorëve nga shitjet agresive dhe mashtrimet telefonike.
Ligji po shkakton ndërkohë shqetësim në Marok, ku mijëra punonjës të call-centerave punojnë për kompani që telefonojnë klientë në Francë.
Qeveria marokene paralajmëron se deri në 50 mijë vende pune mund të preken nga kufizimet e reja franceze. /euronews.al
