Finlanda ka nisur të mërkurën operimin e minierës së saj të parë të litiumit, me synimin për të forcuar furnizimin e zinxhirit evropian të prodhimit të baterive.
Kompania minerare Keliber ka filluar nxjerrjen e litiumit në pjesën perëndimore të vendit, duke shënuar kështu nisjen e projektit të parë në Evropë për prodhimin e litiumit të gradës së baterive. Sipas transmetuesit publik Yle, ky investim i shumëpritur synon të vendosë themelet për prodhimin vendas evropian të këtij materiali strategjik.
Drejtori ekzekutiv, Hannu Hautala, theksoi se prodhimi brenda Evropës do të sjellë avantazh konkurrues, falë distancave më të shkurtra të furnizimit krahasuar me importet nga Kina.
Zona e minierës shtrihet në tre komuna të Finlandës perëndimore: Kaustinen, Kokkola dhe Kronoby. /skyweb.al
