Komisioni i Prokurimit Publik ka vendosur të heqë pezullimin dhe të urdhërojë vijimin e menjëhershëm të procedurës së tenderimit për mirëmbajtjen e sistemit të fiskalizimit, në një moment kur platforma po përballet prej javësh me probleme funksionimi që kanë krijuar shqetësime te bizneset dhe administrata tatimore.
Vendimi vjen pas shqyrtimit me procedurë urgjente të ankimimit të paraqitur nga operatori ekonomik DATA LOG, lidhur me tenderin e zhvilluar nga Agjencia Kombëtare e Shoqërisë së Informacionit për llogari të Drejtorisë së Përgjithshme të Tatimeve.
Bllokohet sërish tenderi i mirëmbajtjes së sistemit të fiskalizimit
KPP ka pranuar pjesërisht ankesën, duke kërkuar korrigjimin e elementeve të dokumentacionit, por njëkohësisht ka urdhëruar autoritetin kontraktor që të mos vonojë më procedurën dhe të vijojë me hapat e mëtejshëm të prokurimit.
Procedura, me fond limit rreth 770 milionë lekë ose rreth 7.7 milionë euro pa TVSH, ishte planifikuar të zhvillohej që në fund të dhjetorit 2025, por ankimimet dhe procesi i rishikimit në KPP e kanë zvarritur finalizimin e saj.
Tenderi ka si objekt mirëmbajtjen e modulit të menaxhimit të kontrollit të faturimit, që përbën bërthamën e sistemit të fiskalizimit.
Ky sistem mbështet përpunimin e faturave elektronike, verifikimin e tyre dhe komunikimin me administratën tatimore, duke shërbyer për rreth 125 mijë tatimpagues dhe për vetë institucionet publike.
Sipas dokumentacionit teknik, funksionimi i pandërprerë i platformës është kritik, pasi shërbimet duhet të jenë aktive 24 orë në ditë dhe nuk tolerohen ndërprerje përtej disa minutave.
Problemet e raportuara së fundmi në funksionimin e sistemit kanë rritur presionin për përfundimin sa më shpejt të kontratës së mirëmbajtjes.
KPP ka konstatuar se AKSHI ka reflektuar kërkesat e mëparshme të Komisionit për përmirësimin e dokumenteve të tenderit dhe, në këto kushte, ka vendosur heqjen e pezullimit dhe vijimin e procedurës. Vendimi hyn në fuqi menjëherë, duke i hapur rrugë finalizimit të kontratës pas disa muajsh zvarritje.
Zhvillimi i tenderit konsiderohet kyç për stabilizimin e sistemit të fiskalizimit, i cili është një nga platformat më kritike të infrastrukturës digjitale fiskale në vend dhe ka ndikim të drejtpërdrejtë në operacionet e përditshme të bizneseve dhe administratës tatimore. /skyweb.al
