Shtesat mujore për pensionistët do të variojnë nga 600 në 1.800 lekë, në varësi të kategorisë dhe masës së pensionit. Skema e paralajmëruar nga qeveria parashikon kufij për përfitimin, duke lënë jashtë pensionistët që marrin mbi shumat e përcaktuara për secilën kategori.
Kryeministri Edi Rama deklaroi se rritja ekonomike krijon mundësi që shtesat të dyfishohen në vitet pasardhëse. Ai përmendi gjithashtu presionin që rritja e kostos së ushqimeve dhe naftës ushtron mbi pensionistët.
“Ekonomia na e ka dhënë mundësinë, rritja e pensioneve të dyfishohet në çdo vit pasardhës”, u shpreh Rama.
Sipas skemës së njoftuar, nga janari, përfituesit e pensionit të pleqërisë dhe nënat me shumë fëmijë do të marrin 1.800 lekë shtesë në muaj, me kusht që pensioni i tyre të mos jetë më i lartë se 40 mijë lekë.
Për përfituesit e pensionit të pjesshëm të pleqërisë dhe pensionit social, shtesa do të jetë 800 lekë në muaj. Në këtë kategori përfshihen ata që marrin pension nën 22 mijë lekë në muaj.
Pensionistët e fshatit dhe ish-kooperativistët me pension nën 18 mijë lekë do të përfitojnë një shtesë mujore prej 1.000 lekësh.
Për përfituesit e pensionit familjar, shtesa parashikohet në masën 700 lekë në muaj, nëse pensioni është nën 18 mijë lekë.
Ndërsa përfituesit e pensionit të invaliditetit do të marrin 600 lekë shtesë në muaj, nëse pensioni i tyre është nën 30 mijë lekë.
Në total, skema parashikon të përfshijë rreth 727 mijë pensionistë, ndërkohë që numri i përgjithshëm i tyre në vend është afërsisht 770 mijë.
Shtesën më të lartë, prej 1.800 lekësh, pritet ta marrin rreth 36 për qind e përfituesve. Grupi më i madh, afërsisht 41 për qind, do të përfitojë 800 lekë në muaj.
Rreth 10,3 për qind do të marrin shtesën prej 1.000 lekësh, ndërsa pjesa tjetër do të përfitojë 600 ose 700 lekë në muaj, sipas kategorisë përkatëse. /skyweb.al
