Kryeministri Edi Rama paralajmëroi vendosjen e një supertakse për pronarët që blejnë apartamente dhe i mbajnë bosh, duke zgjedhur të mos i japin me qira.
Sipas tij, pronarët kanë të drejtë të vendosin për mënyrën e përdorimit të pronës, por kjo zgjedhje duhet të shoqërohet me një barrë më të lartë tatimore nëse apartamentet mbeten të pashfrytëzuara.
“Një super-taksë prone për ata që blejnë e mbajnë apartamente bosh, duke refuzuar t’i japin me qira. Është e drejta e tyre, po duhet të paguajnë njësoj siç po bëjnë në disa vende të tjera të Europës që po përballen me koston e rritur të apartamenteve”, deklaroi Rama.
Kryeministri e lidhi propozimin me rritjen e kostos së apartamenteve, duke iu referuar masave që, sipas tij, po zbatohen edhe në vende të tjera europiane.
Një tjetër ndërhyrje e paralajmëruar lidhet me pronat luksoze në zonat bregdetare. Rama tha se për këto prona parashikohen masa që pritet të përfshihen në një ligj të veçantë.
Ai paralajmëroi taksa më të larta për vilat në bregdet, duke i përfshirë ato në kategoritë që do të përballen me detyrime të shtuara.
Gjithashtu, kryeministri njoftoi një rritje të ndjeshme të çmimit të ujit që përdoret për mbushjen e pishinave.
Në paketën fiskale, sipas Ramës, do të përfshihet edhe një supertaksë për makinat e luksit.
Kryeministri argumentoi se masat synojnë të krijojnë më shumë solidaritet me qytetarët që ndiejnë më fort presionin nga rritja e kostove të jetesës.
