Qeveria miratuar dje transferimin e 88.5 hektarëve tokë shtetërore në Vlorë në dispozicion të kompanisë “Rams Albania”, për zhvillimin e projektit “Vlorë TEDA/RAMS Free Zone”.
Vendimi vjen në një moment të ndjeshëm politik dhe gjeostrategjik, kur burime diplomatike dhe të sigurisë flasin për pakënaqësi në Ankara ndaj qeverisë Rama, për shkak të afrimit të Tiranës me Izraelin në sektorët e mbrojtjes dhe turizmit, si dhe me Italinë në fushën e mbrojtjes, përfshirë edhe Pashalimanin.
Sipas burimeve të Skyweb.al, në zyrën e Ramës kanë mbërritur sinjale se protesta të fundit kundër qeverisë mund të jenë nxitur ose mbështetur edhe nga elementë të lidhur me interesa ekonomike dhe fetare pranë rrethit të Presidentit Erdogan.
Këto shqetësime, sipas të njëjtave burime, i janë përcjellë edhe kryeministrit Edi Rama përmes kanaleve të ndryshme të inteligjencës vendase, të cilat kanë perceptuar lëvizje intensive në këtë drejtim edhe në Tiranë.
Në këtë sfond, vendimi për projektin RAMS në Vlorë shihet jo vetëm si një lëvizje ekonomike, por edhe si një përpjekje për të ruajtur ekuilibrat me Turqinë dhe rrethin e biznesit pranë Presidentit Recep Tayyip Erdogan.
Javën e kaluar, Rama zhvilloi një takim me ambasadorin turk në Tiranë. Burime pranë zhvillimeve bëjnë me dije se pjesë e bisedës, krahas raporteve mes dy vendeve kanë qenë edhe pakënaqësitë e mundshme të Ankarasë, një dyshim i Ramës për furnizim të protestës me protestues nga influencat turke në Tiranë dhe ndikimi i rivalitetit rajonal mes Turqisë, Izraelit dhe Italisë në vendimmarrjet strategjike të qeverisë shqiptare.
Vendimi
Në vendimin e qeverisë thuhet se pasuritë shtetërore vihen në dispozicion për zhvillimin dhe realizimin e projektit të investimit strategjik “Vlorë TEDA/RAMS Free Zone” nga subjekti investues “Rams Albania” sh.p.k., me NUIS M42427018I.
Projekti mori statusin e investimit strategjik nga Komiteti i Investimeve Strategjike në muajin shkurt. Vlera e parashikuar e investimit është rreth 100 milionë dollarë, ndërsa dokumentet e projektit flasin për mundësinë e krijimit të deri në 10 mijë vendeve pune.
Zona pritet të zhvillohet si një ekosistem industrial, logjistik dhe teknologjik. Në të parashikohen aktivitete që lidhen me teknologjinë industriale, automatizimin, inteligjencën artificiale, përpunimin e lehtë mekanik të metaleve, trajtime jo-ndotëse sipërfaqësore dhe energjinë e rinovueshme.
Sipas të dhënave të bëra publike më herët, projekti i plotë parashikon një zonë prej rreth 158 hektarësh në Vlorë. Nga kjo sipërfaqe, pjesa më e madhe përbëhet nga tokë shtetërore, ndërsa pjesë të tjera përfshijnë prona private dhe zona me të dhëna kadastrale që kërkojnë saktësim.
“Rams Albania” zotërohet nga Mehmet Faruk Burbul, i njohur si drejtues i grupit ndërkombëtar RAMS Global. Kompania ka origjinë në sektorin e ndërtimit dhe pasurive të paluajtshme dhe operon në disa vende, përfshirë Kazakistanin, Turqinë, Tajlandën dhe Emiratet e Bashkuara Arabe.
RAMS Global njihet edhe si sponsori i stadiumit të Galatasaray në Stamboll, “RAMS Park”, një nga simbolet më të dukshme të pranisë së grupit në Turqi.
Imazhi publik i kompanisë është forcuar edhe përmes aktorit turk Burak Özçivit, i njohur gjerësisht në Shqipëri për rolin e Osmanit në serialet turke. Në qershor të vitit të kaluar, aktori vizitoi Vlorën, ku u prit edhe nga kryebashkiaku i atëhershëm Ermal Dredha.
Në atë kohë vizita u paraqit kryesisht si pushim turistik, por zhvillimet e mëvonshme tregojnë se prania e tij mund të ketë pasur edhe dimension biznesi, në një periudhë kur RAMS ishte në negociata për projektin e madh në Vlorë. /skyweb.al
