Kryeministri Edi Rama ka reaguar ndaj pretendimeve se zëvendëskryeministrja Belinda Balluku ushtron ndikim mbi të dhe vendimmarrjen në qeveri, duke mohuar kategorikisht se mbahet peng apo shantazhohet prej saj.
Gjatë mbledhjes së Asamblesë Kombëtare të Partisë Socialiste, të zhvilluar të shtunën në Gjirin e Lalzit, Rama ka folur me tone të ashpra për këtë çështje në pjesën e diskutimeve që u zhvilluan me dyer të mbyllura.
Sipas raportimeve nga mbledhja, kryeministri ka kundërshtuar pretendimet se Balluku ndikon në përzgjedhjen e ministrave dhe emërimet në administratën publike.
“Ju keni ngritur një legjendë se mua më mban peng dhe më bën shantazh Balluku. Mua nuk më mban peng askush dhe ministrat i zgjedh vetë, ndërsa drejtorët i zgjedhin ministrat në bashkëpunim me drejtuesit politikë të qarqeve”, mësohet të jetë shprehur Rama.
Me këtë deklaratë, kreu i qeverisë ka synuar të hedhë poshtë zërat për një ndikim të Ballukut mbi vendimet e tij politike dhe qeveritare.
Rama ka theksuar se përgjegjësia për përzgjedhjen e kabinetit qeveritar i takon personalisht atij, ndërsa emërimet në nivelet drejtuese të administratës bëhen nga ministrat, në koordinim me drejtuesit politikë të Partisë Socialiste në qarqe.
Deklaratat vijnë në një kohë kur roli dhe ndikimi i Belinda Ballukut brenda qeverisë dhe Partisë Socialiste janë bërë objekt diskutimesh, veçanërisht në kontekstin e zhvillimeve të fundit që lidhen me hetimet e SPAK. /skyweb.al
