Paketat turistike në Shqipëri rrezikojnë të shtrenjtohen me 10–15% gjatë vitit 2027, si pasojë e rritjes së TVSH-së për akomodimin, zhvlerësimit të euros dhe shtimit të kostove të operimit.
Paralajmërimi vjen nga Rrahman Kasa, kryetar i Unionit Turistik Shqiptar, i cili në një intervistë për revistën “Monitor” shprehet se ndryshimet e parashikuara në Paketën e re Fiskale mund të dobësojnë konkurrueshmërinë e turizmit shqiptar.
Sipas tij, rritja e TVSH-së për akomodimin nga 6% në 10% do të rëndojë veçanërisht mbi hotelet që kanë lidhur tashmë kontrata me operatorët ndërkombëtarë për sezonin e ardhshëm.
Këto struktura nuk mund t’i ndryshojnë çmimet e dakordësuara dhe për rrjedhojë do të detyrohen ta përballojnë vetë koston shtesë, duke reduktuar fitimet.
Ndërkohë, për rezervimet individuale dhe kontratat e reja, barra fiskale pritet të reflektohet drejtpërdrejt në çmimet që do të paguajnë turistët.
“Duke i marrë së bashku këta dy faktorë, vlerësoj se çmimet e akomodimit mund të rriten me 10-15%, ku një pjesë e konsiderueshme e kësaj rritjeje lidhet me efektin e kursit të këmbimit”, deklaron Kasa për “Monitor”.
Ai paralajmëron se Shqipëria rrezikon të humbasë një nga avantazhet kryesore që e ka bërë tërheqëse për turistët e huaj: çmimet relativisht të ulëta.
Sipas Kasës, shtrenjtimi i shërbimeve mund të ndikojë edhe në investimet e reja, pasi bizneset do të kenë më pak hapësira financiare për zgjerimin e aktivitetit.
Përfaqësuesi i industrisë turistike thekson gjithashtu se viti 2026 pritet të mbyllet me rezultate më të dobëta se parashikimet fillestare.
Ai i referohet të dhënave të INSTAT-it, sipas të cilave hyrjet e shtetasve të huaj janë rritur me rreth 4%, një ritëm që e konsideron nën pritshmëritë e sektorit.
Për të shmangur rëndimin e mëtejshëm të situatës, Unioni Turistik Shqiptar kërkon vendosjen e një norme të unifikuar TVSH-je prej 10% për të gjithë zinxhirin e shërbimeve turistike, përfshirë akomodimin, transportin, shërbimet SPA dhe bar-restorantet brenda strukturave të certifikuara.
Sipas Kasës, kjo do ta bënte sistemin fiskal më të thjeshtë dhe më të parashikueshëm, duke ndihmuar Shqipërinë të ruajë konkurrueshmërinë përballë destinacioneve të tjera të rajonit.
