Shqipëria po ndërmerr një hap të ri drejt organizimit dhe zhvillimit të turizmit natyror, përmes një rregulloreje të re që synon standardizimin e administrimit të shtigjeve turistike në të gjithë vendin.
Ministria përgjegjëse për turizmin ka miratuar kuadrin e ri rregullator, i cili përcakton mënyrën se si do të regjistrohen, kategorizohen, mirëmbahen dhe kontrollohen itineraret turistike. Qëllimi kryesor është garantimi i një eksperience më të sigurt për vizitorët, si dhe rritja e cilësisë së ofertës turistike shqiptare.
Në bazë të rregullores, të gjitha shtigjet do të përfshihen në një Regjistër Kombëtar dhe do të klasifikohen në katër nivele: shtigje të lehta, shtigje malore me vështirësi mesatare, shtigje malore të vështira dhe rrugëkalime alpine. Për përcaktimin e kategorisë do të merren parasysh kushtet e terrenit, pjerrësia, ekspozimi ndaj rreziqeve natyrore dhe niveli i vështirësisë gjatë ecjes.
Një risi tjetër është ngritja e Platformës Kombëtare të Shtigjeve Turistike, e cila do të shërbejë si një pikë referimi për turistët dhe të apasionuarit pas natyrës. Në këtë platformë do të publikohen të dhëna të detajuara për itineraret, duke përfshirë distancën, kohëzgjatjen e ecjes, shkallën e vështirësisë, atraksionet përgjatë rrugës, burimet e ujit dhe shërbimet mbështetëse.
Gjithashtu, përdoruesit do të kenë akses në informacione mbi kushtet e motit, rreziqet e mundshme dhe çdo kufizim apo mbyllje të përkohshme të shtigjeve.
Rregullorja vendos detyra të përcaktuara për institucionet që do të jenë përgjegjëse për administrimin e këtij rrjeti, ndërsa sinjalistika do të unifikohet sipas standardeve të përbashkëta kombëtare. Po ashtu, specialistët që angazhohen në projektimin, kontrollin dhe mirëmbajtjen e shtigjeve do të duhet të ndjekin procese trajnimi dhe certifikimi.
Në rastet kur identifikohen rreziqe për sigurinë e turistëve apo për mbrojtjen e mjedisit, autoritetet do të kenë të drejtë të ndërhyjnë përmes vendosjes së kufizimeve, ndryshimit të itinerarit ose mbylljes së përkohshme të tij.
Me këtë rregullore synohet krijimi i një rrjeti më të organizuar dhe më të sigurt të shtigjeve turistike, duke i dhënë një shtysë të mëtejshme zhvillimit të turizmit malor dhe atij të aventurës në Shqipëri. /skyweb.al
