Një rrjet i ri ballkonesh panoramike do të ndërtohet së shpejti në disa zona të mbrojtura në Shqipëri, me synimin për t’u ofruar vizitorëve një përvojë turistike më të plotë, edukative dhe ndërgjegjësuese në natyrë.
Kryeministri Edi Rama bëri publike sot disa prej këtyre projekteve, të cilat pritet të realizohen në parqet kombëtare dhe natyrore. Ai u shpreh se ballkonet do të jenë struktura të lehta, të integruara me kujdes në mjedis dhe të krijuara për të përmirësuar mënyrën se si vizitorët përjetojnë peizazhet e vendit.
“Të projektuara në harmoni me natyrën, këto pika panoramike do t’u ofrojnë vizitorëve hapësira të sigurta për të parë dhe shijuar bukuritë e parqeve tona”, deklaroi Rama.
Ballkonet panoramike do të vendosen në 12 qarqet e vendit, në zona që ofrojnë pamje mbresëlënëse, si: Parku Kombëtar Mali i Tomorit në Berat; Parku Kombëtar Lurë-Mali i Dejës në Dibër; zona e Divjakë-Karavastasë në Fier; Maja e Kallabakut në Parkun Natyror Korab-Koritnik në Kukës; Parku Natyror Syri i Kaltër në Vlorë; Parku Kombëtar Mali i Dajtit në Tiranë; Parku Natyror Qafështamë në Durrës; Parku Kombëtar Bredhi i Hotovës në Gjirokastër; Parku Kombëtar Shebenik në Elbasan, dhe të tjera pika me rëndësi natyrore.
Përmes këtij projekti synohet krijimi i 12 pikave panoramike të ndërtuara në përputhje me karakteristikat e secilës zonë, duke i afruar vizitorët më shumë me natyrën, peizazhet dhe biodiversitetin e pasur të parqeve. Kjo nismë pritet të rrisë potencialin ekoturistik në të gjitha qarqet e vendit. /Skyweb.al
