Islanda, një nga vendet e rralla në botë që historikisht nuk ka pasur mushkonja, po përjeton një ndryshim të paprecedentë. Për herë të parë këto insekte janë shfaqur në territorin e saj.
Deri më tani, vetëm Antarktida dhe Islanda kishin mbetur zona pa mushkonja, por ngrohja globale duket se po ndryshon gjithçka.
Sipas The Guardian, prania e mushkonjave është konfirmuar nga shkencëtari Matthías Alfreðsson, entomolog në Institutin e Shkencave Natyrore në Islandë. Ai ka identifikuar tri ekzemplarë të llojit Culiseta annulata, dy femra dhe një mashkull që i ishin dërguar nga një qytetar i apasionuar pas shkencës. Kjo lloj mushkonje është e njohur për rezistencën ndaj temperaturave të ulëta dhe aftësinë për të mbijetuar në vende të mbyllura si bodrume dhe stalla.
Shkencëtarët prej kohësh kishin paralajmëruar se, nëse temperaturat do të vazhdonin të rriteshin, mushkonjat do të mund të mbërrinin edhe në Islandë, duke përfituar nga habitatet ekzistuese si moçale dhe pellgje të mbushura me ujë të ndenjur.
Ngrohja klimatike është veçanërisht e theksuar në këtë vend nordik. Sipas matjeve të fundit, Islanda po ngrohet rreth katër herë më shpejt se pjesa tjetër e hemisferës veriore. Kjo ka sjellë pasoja të shumta, përfshirë shkrirjen e akullnajave dhe hyrjen e specieve të reja ujore që më parë nuk ishin hasur në ujërat e ftohta islandeze.
Fenomeni nuk kufizohet vetëm në Islandë. Në Mbretërinë e Bashkuar, për shembull, janë raportuar kohët e fundit mushkonja tigër (Aedes albopictus) dhe mushkonja egjiptiane (Aedes aegypti), të dyja të njohura për përhapjen e sëmundjeve tropikale si virusi Zika dhe chikungunya. /Skyweb.al
