Konsumatorët që përdorin shërbimet “Buy Now, Pay Later” (BNPL), “Bjej tani, paguaj më vonë”, të cilat u mundësojnë të blejnë produkte menjëherë dhe të paguajnë më vonë me këste, po përballen me kontrolle më të rrepta financiare, pas hyrjes në fuqi të rregullave të reja në korrik.
Këto shërbime, të ofruara nga kompani si Klarna dhe Clearpay, kanë funksionuar prej kohësh si një formë kredie, por tashmë i nënshtrohen zyrtarisht mbikëqyrjes dhe rregullimit nga autoritetet përkatëse.
Sipas rregullave të reja, kompanitë duhet të kenë miratimin e autoriteteve rregullatore për të ushtruar aktivitetin e tyre. Ndryshimet u japin konsumatorëve më shumë mbrojtje, përfshirë mundësinë për të kërkuar rimbursim dhe për t’iu drejtuar mekanizmave të pavarur të shqyrtimit të ankesave në rast problemesh.
Një nga ndryshimet kryesore është detyrimi për të kryer kontrolle mbi aftësinë paguese të klientëve për çdo transaksion BNPL. Kjo do të thotë se përdoruesit mund të mos lejohen të kryejnë një blerje nëse vlerësohet se nuk kanë mundësi financiare për të shlyer këstet.
Kontrollet ndryshojnë në varësi të vlerës së blerjes dhe shumës së marrë hua. Si pasojë, edhe klientët që kanë përdorur më parë këto shërbime mund të përballen me refuzimin e një transaksioni ose me uljen e ndjeshme të limitit të tyre të kreditimit.
Për të shmangur kufizimet financiare, ekspertët këshillojnë konsumatorët të tregohen më të kujdesshëm me blerjet dhe të vlerësojnë nëse produktet që duan të blejnë janë vërtet të nevojshme apo mund të shtyhen për një moment tjetër.
Sara Williams, ish-këshilltare vullnetare për borxhet pranë organizatës Citizens Advice, rekomandon gjithashtu shmangien e blerjeve të panevojshme që kërkojnë limite të larta kredie, anulimin e abonimeve që rëndojnë buxhetin dhe kërkimin e ndihmës nga organizatat që ofrojnë këshillim për personat në vështirësi financiare.
Ajo thekson se përdorimi i shërbimeve BNPL për të përballuar shpenzimet bazë mund të jetë një shenjë e vështirësive ekonomike dhe se në këto raste konsumatorët duhet të kërkojnë ndihmë sa më herët.
Ndërkohë, personat që kanë vështirësi në shlyerjen e kredive, përfshirë pagesat me këste, këshillohen të mos presin derisa borxhet të dalin jashtë kontrollit. Platforma qeveritare britanike MoneyHelper ofron këshillim falas për menaxhimin e detyrimeve financiare, identifikimin e ndihmave ekonomike dhe përcaktimin e faturave që duhet të paguhen me përparësi.
Ekspertët paralajmërojnë gjithashtu për ofertat e dyshimta për zgjidhjen e borxheve që promovohen në rrjetet sociale, duke këshilluar konsumatorët të verifikojnë gjithmonë besueshmërinë e tyre përpara se të ndjekin këshilla të tilla. /skyweb.al
