Kryebashkiaku i Tiranës, Erion Veliaj, ka reaguar nga burgu ndaj akuzave dhe pretendimeve të shprehura nga kryeministri se ka organizuar apo financuar protestat kundër qeverisë. Në një postim në rrjetet sociale, Veliaj i ka mohuar këto pretendime, duke sfiduar kryeministrin Edi Rama të paraqesë qoftë edhe një provë të vetme.
Veliaj thotë se nuk pranon që të cenohet dinjiteti i tij, ndërsa thekson se, ndonëse ka më pak liri se kryeministri, ka më shumë dinjitet se ai.
“Dua të siguroj socialistët se unë nuk e gjuaj shtëpinë time socialiste me gurë, por as nuk lejoj të gjuajë me gurë askush mbi dinjitetin tim.
Unë vërtet kam më pak liri sesa Kryeministri, por kam shumë herë më tepër dinjitet se ai”, shkruan ai.
Në reagimin e tij, ai kundërshton atë që i cilëson si “haluçinacione bolshevike” për përfshirjen në organizimin apo financimin e protestave dhe publikon një letër, të cilën thotë se e ka shkruar me dorën e tij, duke e cilësuar si të gjithë të vërtetën e takimit me ministrin e Drejtësisë, Toni Gogu.
“Refuzoj haluçinacionet bolshevike që unë kam organizuar ose financuar protestat dhe e gjithë e vërteta e takimit me ministrin e Drejtësisë, Toni Gogu, është kjo letër e shkruar me dorën time.
Sfidoj Kryeministrin e vendit të nxjerrë një provë të vetme për aludimet e protestave.
Ndryshe ik!”, duke artikuluar edhe kërkesën për largimin e kryeministrit.
Sipas përmbajtjes së letrës, takimi është zhvilluar të premten, në orën 22:30, pas 20 muajsh. Në të përshkruhet një bisedë ku ministri Gogu i ka komunikuar Veliajt se kryeministri Rama ishte përfshirë personalisht në vendimin për transferimin dhe izolimin e tij, si dhe në çështje që lidhen me lejet për spital dhe takimet me familjarët e miqtë.
Letra e plotë e publikuar nga Veliaj:
E premte, ora 22:30�
Toni Gogu vjen në takim pas 20 muajsh.
TG: R ka bërë transferimin, urdhër që ky nga konvikt duhet të bëjë burg tamam dhe që personalisht është marrë dhe me lejen për spital, lejet për takime, deri te aksesi tek miqtë e familja.
R ka bypass TG dhe ka urdhëruar vetë transferimin e izolimin me këto 3 kërkesa:
– Prano përfshirjen me Flamingot – Studentët ose do të shtohen akuzat për “prishje të rendit kushtetues” nga burgu e do bësh 100 vjet burg në 313 e 302.
– Hiq dorë nga bashkia TR dhe delegoje (te Arbër Hajdari).
– Mos u këshillo më me Plarent Ndrecën.
/skyweb.al
