Një avion i kompanisë ajrore Wizz Air, që po udhëtonte nga Londra drejt Sofjes në Bullgari, është detyruar të ndryshojë destinacionin pas një alarmi për bombë në bord.
Ngjarja ka ndodhur këtë të hënë, ndërsa avioni ishte në fluturim dhe po transportonte pasagjerë nga Britania e Madhe drejt kryeqytetit bullgar.
Sipas Euronews, avioni ishte nisur nga aeroporti Luton i Londrës dhe kishte si destinacion aeroportin e Sofjes, por gjatë udhëtimit është marrë një kërcënim për bombë.
Pas alarmit, është vendosur devijimi i menjëhershëm i fluturimit drejt Budapestit, në Hungari.
Kompania Wizz Air ka konfirmuar incidentin përmes një deklarate zyrtare të shpërndarë për Euronews.
“Wizz Air konfirmon se fluturimi i sotëm Londër Luton–Sofje u devijua drejt Budapestit pas një kërcënimi për bombë të marrë gjatë fluturimit”, thuhet në deklaratën e kompanisë.
Alarmi ka shkaktuar ndërprerjen e udhëtimit dhe aktivizimin e procedurave të sigurisë për avionin.
Ende nuk ka informacione nëse në avion është konstatuar ndonjë objekt i dyshimtë apo nëse kërcënimi ka rezultuar i rremë.
Autoritetet pritet të sqarojnë rrethanat e incidentit dhe origjinën e kërcënimit që detyroi avionin të ndryshonte destinacion.
