Kompania ajrore Volotea ka njoftuar zyrtarisht nisjen e negociatave me kreditorët, pasi problemet financiare e kanë çuar çështjen në Gjykatën Tregtare nr. 9 të Barcelonës.
Procedura e përdorur njihet në Spanjë si “preconcurso de acreedores” dhe synon arritjen e një marrëveshjeje për ristrukturimin e borxhit përpara hapjes së një procesi të mundshëm falimentimi.
Ky mekanizëm i jep kompanisë disa masa mbrojtëse përballë kreditorëve, ndërsa ajo negocion mënyrën e shlyerjes së detyrimeve dhe përpiqet të sigurojë vijimin e aktivitetit.
Procedura nuk nënkupton se Volotea ka shpallur falimentimin apo se do të ndërpresë menjëherë operacionet.
Kompania vazhdon të kryejë fluturime dhe të shesë bileta, ndërsa hapja e negociatave nuk sjell automatikisht anulimin e fluturimeve të programuara.
Problemet financiare ishin sinjalizuar më herët edhe nga audituesi EY, i cili kishte evidentuar pasiguri materiale mbi vijimësinë e aktivitetit të kompanisë.
Volotea ka nisur paralelisht kërkimin e kapitalit të ri dhe ka përgatitur një plan për zvogëlimin e flotës.
Numri i avionëve pritet të ulet nga 44 aktualisht në rreth 30–35, ndërsa masat përfshijnë edhe ndërhyrjen në afro 50 vende pune në zyrat e Barcelonës.
Sipas të dhënave të publikuara nga “Hosteltur”, borxhi i kompanisë arrin në rreth 356 milionë euro.
Në listën e kreditorëve ndodhet edhe kompania publike spanjolle SEPI, e cila në vitin 2022 i dha Voloteas një financim prej 200 milionë eurosh.
Kompania synon t’i përfundojë negociatat me kreditorët brenda muajit dhjetor. Megjithatë, mbetet ende e paqartë se si zvogëlimi i flotës do të ndikojë te bazat operative, linjat ajrore dhe frekuencat e fluturimeve. /skyweb.al
