Autoritetet amerikane kanë urdhëruar ndalimin e nisjes së të gjitha fluturimeve nga aeroportet e Shteteve të Bashkuara, pas një problemi serioz në sistemet e komunikimit të kontrollit të trafikut ajror.
Administrata Federale e Aviacionit (FAA) njoftoi të premten, më 13 nëntor, vendosjen e një ndalimi në shkallë kombëtare, duke argumentuar se masa ishte e domosdoshme për garantimin e sigurisë së fluturimeve.
Sipas Reuters, vendimi erdhi pas ndërprerjeve të konsiderueshme në komunikimet ndërmjet qendrave të kontrollit ajror, të cilat mbikëqyrin lëvizjen e avionëve në hapësirën ajrore amerikane.
Sekretari amerikan i Transportit, Sean Duffy, konfirmoi se problemi teknik kishte prekur të gjitha qendrat rajonale të kontrollit të trafikut ajror në vend.
FAA e cilësoi situatën si një rrethanë të jashtëzakonshme, që kërkonte ndërhyrje të menjëhershme për arsye sigurie.
Të gjithë avionët që ndodhen në tokë janë urdhëruar të mos ngrihen deri në një njoftim të dytë.
Masa prek nisjet e fluturimeve në të gjithë territorin amerikan, ndërsa avionët që ndodhen tashmë në ajër mund të vijojnë drejt destinacioneve të tyre, sipas udhëzimeve të kontrollit ajror.
Për fluturimet ndërkombëtare, autoritetet kanë bërë të ditur se situata do të trajtohet rast pas rasti.
Problemet u evidentuan fillimisht në Çikago, ku FAA urdhëroi ndalimin e fluturimeve për shkak të vështirësive në komunikimin ndërmjet kontrollorëve të trafikut ajror dhe avionëve.
Pak më vonë, ndërprerjet rezultuan më të përhapura, duke detyruar autoritetin federal të zgjeronte masën në të gjithë vendin.
Vendimi konsiderohet jashtëzakonisht i rrallë në historinë e aviacionit amerikan.
Kjo është vetëm hera e dytë që prej sulmeve terroriste të 11 shtatorit 2001 që SHBA ndalon në shkallë kombëtare nisjen e të gjitha fluturimeve.
Rasti i mëparshëm ndodhi në janar 2023, kur një defekt në sistemin e njoftimeve për pilotët detyroi FAA-në të pezullonte për më pak se dy orë të gjitha nisjet e fluturimeve të brendshme.
Incidenti i fundit rikthen shqetësimet për gjendjen e infrastrukturës teknologjike që përdoret për menaxhimin e hapësirës ajrore amerikane.
Vetëm vitin e kaluar, Kongresi amerikan miratoi 12.5 miliardë dollarë për modernizimin e sistemeve të vjetruara të komunikimit të FAA-së.
Ndërkohë, pikërisht këtë të premte, FAA dhe Shtëpia e Bardhë i kërkuan Kongresit edhe 30.1 miliardë dollarë të tjerë për adresimin e problemeve të mbetura në infrastrukturën e kontrollit ajror.
Ndërprerja në shkallë kombëtare rrezikon të shkaktojë vonesa dhe anulime të shumta, me pasoja edhe për fluturimet ndërkombëtare që lidhen me aeroportet amerikane.
Deri në raportimet e para, autoritetet nuk kishin dhënë një afat për rikthimin e plotë të operacioneve normale dhe as një shpjegim përfundimtar për shkakun e defektit. /skyweb.al
