Thelbi i vendimit është i qartë.
Çdo person që do të luajë baste online do të duhet të identifikohet me të dhëna të verifikuara.
Praktikisht, qeveria po vendos regjistrimin dhe gjurmimin e çdo lojtari që do të hyjë në këto platforma, me argumentin se kjo do të pengojë përdorimin nga persona të paautorizuar dhe nga të miturit.
Bastet, peng i interesave okulte, Malaj thotë se duhet ende punë për legalizimin e tregut
Vendimi i miratuar nga Këshilli i Ministrave, me propozim të Ministrisë së Financave, përcakton edhe rregulla të forta për pagesat, raporton skyweb.al.
Çdo depozitë dhe çdo fitim do të duhet të regjistrohen dhe të monitorohen në kohë reale nga institucionet përgjegjëse, çka do të thotë se i gjithë aktiviteti financiar i lojtarëve dhe operatorëve do të jetë nën mbikëqyrje.
Po ashtu, kompanitë që do të licencohen do të duhet të plotësojnë standarde të caktuara teknike për sistemet kompjuterike dhe pajisjet që përdorin. Para se të futen në punë, këto sisteme do të duhet të certifikohen, me qëllim garantimin e sigurisë dhe kontrollit të tyre.
Ky është vetëm një nga aktet që mungonin. Edhe pse ligji për bastet online hyri në fuqi më 1 prill 2024, ai mbeti për muaj të tërë i pazbatueshëm për shkak të mungesës së akteve nënligjore.
Tani qeveria ka hedhur hapin e parë konkret, ndërsa pritet të miratojë edhe 7 akte të tjera për ta bërë të plotë funksionimin e skemës.
Sipas ligjit, në dispozicion do të jenë 10 licenca, secila me afat 10-vjeçar. Për të hyrë në këtë treg, kompanitë duhet të kenë kapital themeltar 40 milionë lekë, ndërsa tarifa e licencimit është 400 milionë lekë.
Sa i takon tatimit, organizatorët e basteve sportive online do të derdhin 15 për qind të të ardhurave bruto nga loja në Fondin e Posaçëm brenda datës 15 të muajit pasardhës, ndërsa lojtarët do të trajtohen sipas ligjit për tatimin mbi të ardhurat.
Tregu i basteve vijon “në të zezë” prej vitesh. Në lidhje me këtë, Skyweb.al ka bërë një investigim disa muaj më parë, të cilin ju ftojmë ta lexoni KËTU.
