Një nga dosjet më të bujshme të kohëve të fundit, të goditur pjesërisht nga Prokuroria e Posaçme, ka qenë një ndërthurje mes trafikut ndërkombëtar të drogës, transaksioneve në shitje-blerjen e pronave në Zvërnec si dhe pastrimi i parave, ku të përfshirë janë disa nga emrat që janë lakuar prej dekadash në Shqipëri, me në krye Artur Shehun. Ky grup kriminal ka arritur të qarkullojë në sistemet bankare dhe noteriale qindra miliona euro, fillimisht para nga droga, më pas nga pronat dhe më vonë blerje të trojeve dhe apartamenteve në resortet më luksoze në Shqipëri, kryesisht nga Palasa deri në Himarë.
Në këto radhë do të ndalemi te një nga emrat që ndodhen në dosjen e SPAK-ut, një individ që konsiderohet si “pastruesi”, i cili me manovra financiare arrin që të fusë në lojë një “mal” me euro, duke i kamufluar si investime personale apo investime për biznes, kur në fakt të gjitha janë para të ardhura nga bota e krimit. Bëhet fjalë për Edmond Jaupin, një 51 vjeçar, me origjinë nga Tepelena, i cili aktualisht po hetohet me masë shtrënguese sigurie, masë e cila nuk është zbatuar, për shkak se në momentin e vendimit të gjykatës ndodhej në Dubai, në Emiratet e Bashkuara Arabe, një “strehë” e sigurt për dhjetëra persona të akuzuar në Shqipëri.
Vox News ka shfletuar dosjen e Prokurorisë së Posaçme për këtë grup kriminal, ku detajohen të dhëna ndaj Edmond Jaupit, i cili akuzohet për pastrim të produkteve të veprës penale dhe veprimtarisë kriminale.
“Persont nën hetim Adrian Rama e Elton Memeti bashkëpunojnë me personin nën hetim Edmond Jaupaj në investimet që kryejnë si dhe ky i fundit është përfshirë në veprime duke fshehur pronësinë e vërtetë të një mjeti lundrues ‘gomone’, e cila i përket personin nën hetim Adrian Rama” thuhet në këtë akt – akuzë.
Prokuroria ka dokumentuar të gjithë veprimtarinë e këtij grupi, qoftë nga ana shkresore, ashtu dhe nga përgjimet dhe bisedat që këta anëtarë kanë folur me njëri tjetrin. “Veprimet e kryera nga personat nën ehtim Adrian Rama, Elton Memeti, Erjon Rama e Edmond Jaupi për pastrimin e të ardhurave të rredhura nga aktiviteti kriminal në formën e investimeve nëpërmjet faturimeve ndërmjet shoqërive ‘Kryon.83’ me ‘ICLIMA ALBANIA’ e shoqëria ‘ecs ECO Climate Solution’, duke i investuar ato në berje të pasurive të paluajtshme apo në kryerjen e veprimeve për dshehjen e pasrisë së luajtshme” vijon prokuroria.
Roli i Edmond Jaupit ka qenë i përcaktuar në fillim, duke qenë se ai ka disa firma në pronësi dhe xhiron dhjetëra miliona euro, duhet të fusë në qarkullim prona dhe para’ të këtij grupi kriminal. “Gjatë periudhës prill 2023 – mars 2025 nga përgjimet e komunikimeve telefonike të kryera në kuadër të procedimit penal, janë evidentuar disa biseda me interes mes shtetasve nën hetim Adrian Rama dhe Edmond Jaupi. Përmbajtja e këtyre komunikimeve ka nxjerrë të dhëna të mjaftueshme që krijojnë dyshime të arsyeshme se këta shtetas, sëbashku me persona të tjera kanë ndërmarrë veprime të qëllimshme për fshehjen e origjinës së një prone të luajtshme konkretisht një mjeti lundrues të tipit gomone” thuhet në dosje.
Sipas tyre, grupi merrej me pastrim parash pasi arrinte të transferonte, konvertonte apotë fshihte burimin e vërtetë të pasurisë së përfituar në mënrë të paligjshme. “Në datën 24 prill 2023, në orën 17.50 Adrian Rama komunikon me Edmond Jaupin lidhur me një mjet lundrues tip ‘gomone’. Nga analiza e bisedës evidentohet me interes fakti se lidhur me këtë mjet lundrii, i është lënë në përdorim personit nën hetm Adrian Rama” thuhet në dosje./Voxnews
