Të dhënat e INSTAT për vitin 2024 tregojnë se gratë përbëjnë shumicën e popullsisë shqiptare, me 50.5% të totalit, kundrejt 49.5% të burrave. Megjithatë, pavarësisht këtij dominimi numerik, pabarazitë gjinore mbeten të dukshme në tregun e punës dhe të ardhurat.
Raporti gjinor i lindjeve mbetet më i lartë se norma natyrore, me 108 djem për çdo 100 vajza, ndërsa vdekshmëria foshnjore është ulur krahasuar me vitet e mëparshme. Sëmundjet e aparatit të qarkullimit të gjakut mbeten shkaku kryesor i vdekjeve për të dy gjinitë.
Në tregun e punës, papunësia tek gratë arrin në 10%, më e lartë se tek burrat me 8.9%. Për shumë gra, detyrat shtëpiake janë arsyeja kryesore për mosangazhimin në punë, një faktor pothuajse inekzistent tek burrat. Ndërkohë, diferenca gjinore në paga është 4.9% në favor të burrave, edhe pse ka pësuar një ulje krahasuar me një vit më parë.
Përfitimet nga pensionet dominohen nga gratë, sidomos në zonat rurale, ku ato përbëjnë 63.7% të përfituesve.
Hendeku gjinor mbetet ende fenomen, ndërsa ekspertët theksojnë balancimin e politikave. /Skyweb.al
