Me nisjen e vitit të ri shkollor, Ministria e Arsimit dhe Ministria e Ekonomisë, Kulturës dhe Inovacionit kanë miratuar një udhëzim të përbashkët që përcakton masat kryesore për mbarëvajtjen e vitit shkollor 2025–2026 në sistemin arsimor parauniversitar.
Një nga pikat kryesore të udhëzimit është ndalimi i përdorimit të celularëve në ambientet shkollore.
Drejtoritë dhe stafi mësimor janë të ngarkuar me zbatimin e kësaj mase, që synon të ulë shpërqendrimin dhe të përmirësojë cilësinë e mësimdhënies.
Në fokus mbeten edhe masat kundër bullizmit. Udhëzimi kërkon nga Zyrat Vendore të Arsimit Parauniversitar dhe drejtuesit e shkollave zbatimin e Planit Kombëtar të Veprimit për parandalimin e dhunës dhe bullizmit, miratuar në janar 2025.
Masat konkrete përfshijnë:
- planifikimin e veprimtarive sensibilizuese kundër dhunës, bullizmit dhe ekstremizmit;
- ngritjen e këndeve “Stop dhunës në shkollë”;
- krijimin e ekipeve “antibullying” në çdo shkollë.
Gjithashtu theksohet domosdoshmëria për monitorimin nga komisionet e etikës dhe disiplinës, si dhe organizimi i aktiviteteve sensibilizuese më 21 nëntor, në kuadër të Ditës Ndërkombëtare kundër Dhunës në Shkollë.
Ky udhëzim, i botuar në Fletoren Zyrtare, synon të garantojë një vit shkollor më të sigurt, më të disiplinuar dhe me kushte më të mira për nxënësit dhe mësuesit./skyweb.al
