Drejtuesit e Tatimeve, Doganave, KESH-it, OST-së, Albpetrolit dhe institucioneve të tjera kanë dorëzuar dorëheqjet pas kërkesës së kryeministrit Edi Rama.
Por çfarë do të ndodhë me Elira Kokonën e Korporatës së Investimeve Shqiptare dhe Dritan Agollin e Fondit Shqiptar të Zhvillimit?
Për dy drejtuesit që administrojnë prona dhe fonde të konsiderueshme publike ende nuk ka një njoftim publik dorëheqjeje.
A u është kërkuar edhe atyre të dorëzojnë detyrën, apo “furtuna” ndalet përpara zyrave të tyre?
Emri i Kokonës është lidhur me skandalin “Durana Tech Park”, parkun teknologjik në Xhafzotaj, të krijuar nën pronësinë e Korporatës.
Kompanitë e regjistruara në të përfitojnë përjashtime dhe lehtësi fiskale.
Sipas publikimeve të skyweb.al për dosjen AKSHI, kompani të përfshira në aferë planifikonin ta transferonin aktivitetin në Durana për të përfituar përjashtime tatimore, duke shmangur detyrimet fiskale edhe për të ardhurat nga tenderët objekt hetimi për korrupsion.
Madje, aktorë të skandalit AKSHI hapën NIPT-e të reja me adresë pikërisht Durana Tech Park për këtë qëllim.
Siç ka raportuar më herët skyweb.al, pasi merrnin para nga arka e shtetit, përmes këtij mekanizmi synonin të mos paguanin taksa për aktivitetin e tyre.
Ndërkohë, parku regjistronte biznese përpara ndërtimit të infrastrukturës fizike, nën shpjegimin e funksionimit “virtual dhe hibrid”.
Nga ana tjetër, Agolli është përballur prej vitesh me denoncime për tenderët e FSHZH-së. Në vitin 2022, SPAK nisi hetimet për tenderin e menusë së “100 Fshatrave”, që shkaktoi skandal për lidhjen e njërit prej përfituesve me restorantin e djalit të tij. Agolli ka mohuar shkeljet dhe konfliktin e interesit.
Më 12 nëntor 2024, kreu i FSHZH-së u paraqit në SPAK, ku u mor në pyetje, ndërsa vijoi të drejtonte institucionin.
Nëse Rama po kërkon përgjegjësi nga drejtuesit dhe po rishikon performancën e tyre, përse të mos përfshihen edhe Kokona e Agolli? A do t’u kërkojë dorëheqjen edhe këtyre, apo disa karrige mbeten të sigurta pavarësisht skandaleve dhe denoncimeve? /skyweb.al
