“Leskoviku, një qytet i vogël i vendosur në juglindje të Shqipërisë, po kthehet me shpejtësi në një nga pikat më tërheqëse për turistët vendas dhe të huaj.” kështu nis artikulli i revistës “Travel and tour ëorld”, që këtë herë ka zgjedhur për lexuesit bukuritë natyrore të Leskovikut, të cilat nuk duhen humbur për të vizituar.
Me peizazhe mahnitëse malore, pyje të dendur, burime minerale dhe biodiversitet të pasur, ky vend dikur i lënë në hije po bëhet sot një stacion i domosdoshëm për udhëtarët që kërkojnë natyrë të paprekur dhe përvoja autentike, shkruan revista.
Artikulli vijon më tej duke nxjerrë në pah se Leskoviku ofron një peizazh të gjelbër, që fton vizitorët në shëtitje, ngjitje në mal dhe pushime pranë burimeve minerale. Zona njihet për biodiversitetin e rrallë, me flora dhe faunë të pasur, që e bën tërheqëse për natyralistët dhe ekoturistët.
Përveç natyrës, qyteti ruan edhe vlera kulturore e historike. Një ndër pikat më të vizituara është Kisha e Cerskës, e njohur për arkitekturën dhe rolin e saj në komunitetin vendas. Po ashtu, banorët e fshatrave përreth ofrojnë eksperiencën e jetesës tradicionale me mikpritjen karakteristike shqiptare.
Revista përmend gjithashtu burimet termale të Sarandaporos, duke i konsideruar si “spa natyrale” nën qiell të hapur.
Leskoviku njihet për vreshtat e rrushit dhe verën e mirë, ku banorët e zonës vitet e fundit kanë investuar në zhvillimin e kantinave. Ky sektor po fiton gjithnjë e më shumë popullaritet mes turistëve, shkruan “Travel and Tour World”.
Ekspertët e turizmit parashikojnë që Leskoviku do të vazhdojë të rritet, duke e kthyer zonën në një prej destinacioneve kryesore të Shqipërisë për turizëm të qëndrueshëm. /Skyweb.al
