Agjencia ndërkombëtare e vlerësimit të kreditit Standard & Poor’s ka lënë të pandryshuar notën për Shqipërinë në nivelin “BB”, duke ruajtur edhe perspektivën “të qëndrueshme”, sipas një njoftimi të Ministrisë së Financave.
Sipas vlerësimit, ekonomia shqiptare ka treguar rezistencë përballë goditjeve të njëpasnjëshme në vitet e fundit, duke përfshirë tërmetin e vitit 2019, pandeminë dhe krizën e çmimeve të energjisë.
Agjencia parashikon që rritja ekonomike të mbetet në nivele të qëndrueshme, me një zgjerim të PBB-së prej rreth 3.7% në vitin 2025 dhe mbi 3% në vitet pasuese. Turizmi pritet të vijojë të mbetet një nga motorët kryesorë të ekonomisë, duke ndikuar në përmirësimin e bilancit të jashtëm dhe uljen e deficitit të llogarisë korrente.
Në planin fiskal, S&P vlerëson se deficiti buxhetor do të qëndrojë rreth 2.4% të PBB-së në vitin 2026, ndërsa në afatmesëm pritet të stabilizohet rreth 2%. Borxhi publik parashikohet të qëndrojë pranë nivelit 50% të PBB-së, i mbështetur nga një politikë fiskale më e kujdesshme.
Një tjetër element pozitiv sipas agjencisë është avancimi i procesit të integrimit europian, me hapjen e të gjithë kapitujve negociues, që konsiderohet një hap i rëndësishëm për ekonominë dhe klimën e investimeve.
Gjithashtu, rezervat valutore kanë shënuar rritje të ndjeshme, duke arritur në 8.7 miliardë dollarë në fillim të vitit 2026, të mbështetura nga turizmi, remitancat dhe investimet e huaja.
Sektori bankar vijon të paraqitet i qëndrueshëm, me nivele të ulëta të kredive me probleme dhe me likuiditet të lartë, duke reflektuar një situatë më të fortë financiare.
Konfirmimi i vlerësimit nga S&P konsiderohet si një sinjal pozitiv për investitorët dhe një tregues i stabilitetit të ekonomisë shqiptare në një mjedis të pasigurt global.
