Ndryshe nga tregu vendas, ku nafta ka arritur rreth 214 lekë për litër dhe benzina 199 lekë, në Maqedoninë e Veriut çmimet lëvizin rreth 143-150 lekë për litër për naftën dhe rreth 134 lekë për benzinën. Edhe në Kosovë dhe Mal të Zi karburanti tregtohet ndjeshëm më lirë, duke e bërë diferencën të konsiderueshme për konsumatorët shqiptarë.
Si pasojë, gjithnjë e më shumë qytetarë po zgjedhin të furnizohen jashtë vendit, shpesh në baza javore, si një mënyrë për të kursyer shpenzimet. Ky trend është shfaqur më parë gjatë krizës së vitit 2022 dhe duket se po përsëritet me të njëjtin intensitet.
Rritja e kërkesës në vendet fqinje ka sjellë edhe kufizime në disa pika karburanti, ku furnizimi bëhet me sasi të kufizuara për çdo automjet.
Arsyeja kryesore e diferencës së çmimeve lidhet me barrën fiskale në Shqipëri, ku taksat përbëjnë një pjesë të madhe të çmimit final të karburantit. Përfaqësues të sektorit kanë theksuar se kjo e bën naftën në vend ndjeshëm më të shtrenjtë krahasuar me rajonin.
Ndërkohë, paralajmërimet për rritje të mëtejshme të çmimeve për shkak të tensioneve në Lindjen e Mesme shtojnë presionin mbi konsumatorët, duke rritur gjasat që fenomeni i furnizimit jashtë vendit të zgjerohet edhe më tej. /skyweb.al
