Përplasja mes ortakëve në Aeroportin Ndërkombëtar të Vlorës është përshkallëzuar edhe më tej, ndërsa biznesmeni Behgjet Pacolli ka publikuar një tjetër deklaratë të ashpër, ku akuzon Valon Ademi për veprime të jashtëligjshme dhe institucionet shqiptare për mosveprim.
Në reagimin e tij, Pacolli thotë se ngjarjet e dy ditëve të fundit në kantierin e Aeroportit të Vlorës “nuk kanë vend në një shtet të së drejtës”, ndërsa e cilëson të paligjshme ndërhyrjen e policisë në mbështetje të asaj që ai e konsideron padrejtësi.
Sipas deklaratës së shpërndarë nga Mabco Constructions S.A., ndalimi i hyrjes së punonjësve dhe nënkontraktorëve të kompanisë në aeroport po justifikohet përmes një kontrate që kompania e konsideron të paligjshme dhe të kallëzuar në Prokurorinë e Tiranës që në 8 janar 2025.
Pacolli pretendon se kontrata në fjalë është firmosur nga Valon Ademi dhe Valon Lluka, së bashku me tre kontrata të tjera të lidhura me 2A Group, pa dijeninë dhe autorizimin e Mabco-s.
Sipas deklaratës, Mabco është njohur për herë të parë me këto kontrata më 26 shtator 2025 dhe pas analizës juridike i ka kallëzuar ato në organet e drejtësisë. Kompania pretendon se kontratat janë firmosur gjatë vitit të kaluar, por janë post-datuar në mënyrë të paligjshme me data të vitit 2022.
Në reagim thuhet se kontratat e kontestuara janë përdorur për të realizuar përfitime të paligjshme financiare dhe për të dëmtuar Mabco-n. Sipas pretendimeve të kompanisë, përmes tyre është tentuar përfitimi i shumave më të mëdha kredie nga BKT, rritja fiktive e investimeve për të përfituar pagesa të TVSH-së dhe garanci më të mëdha nga shteti mbi të ardhurat nga fluksi i pasagjerëve, si edhe rritja artificiale e kostove të kontratave të lidhura me 2A Group në dëm të Mabco-s.
Pacolli akuzon gjithashtu autoritetet shqiptare për moszbatim të vendimeve të Gjykatës së Apelit dhe të kontratës së koncesionit, duke kërkuar që policia të mos pengojë hyrjen e punëtorëve dhe nënkontraktorëve të Mabco-s në kantier.
Në deklaratë thuhet se ekipi ligjor i Mabco-s ka njoftuar sërish kryeministrin Edi Rama, Ministrinë e Infrastrukturës dhe Policinë e Shtetit për situatën në Aeroportin e Vlorës, duke akuzuar Policinë e Vlorës se nuk po garanton rendin publik, sigurinë dhe mbrojtjen e investimit.
Sipas deklaratës, pengimi i hyrjes së punëtorëve cenon të drejtat e tyre dhe të pronës, ndërsa Mabco paralajmëron se do të vijojë ndjekjen e të gjitha rrugëve ligjore për mbrojtjen e investimit në Aeroportin e Vlorës./skyweb.al
