Sekretari amerikan i Shtetit, Marco Rubio, paralajmëroi se bota po hyn në një fazë të re gjeopolitike, teksa udhëton drejt Evropës për të mbajtur një fjalim në Munich Security Conference, raportoi BBC.
Rubio udhëheq delegacionin amerikan në këtë forum të rëndësishëm, i cili zhvillohet në një klimë të ndjeshme, pas deklaratave të presidentit Donald Trump për aneksimin e Greonlandes, një territor gjysmautonom i Danimarkes, çka ka rritur tensionet me aleatët evropianë.
Sipas Rubios, ndryshimet e shpejta globale kërkojnë që shtetet të rishikojnë rolin dhe strategjitë e tyre në një realitet të ri ndërkombëtar. Paralelisht, presidenti francez Emmanuel Macron ka bërë thirrje që Evropa të forcojë autonominë e saj strategjike ndaj SHBA-së, ndërsa sekretari i përgjithshëm i NATO, Mark Rutte, ka theksuar se lidhjet transatlantike mbeten thelbësore.
Konferenca zhvillohet pas polemikave të vitit të kaluar, kur zëvendëspresidenti amerikan JD Vance kritikoi politikat evropiane për lirinë e shprehjes dhe emigracionin. Nga ana tjetër, kancelari gjerman Friedrich Merz ka bërë thirrje për rikthimin e besimit mes dy anëve të Atlantikut dhe ka zbuluar bisedime konfidenciale me Francën për krijimin e një parandalimi të përbashkët bërthamor evropian.
Aktualisht, vetëm Franca dhe Mbretëria e Bashkuar zotërojnë armë bërthamore në Evropë, ndërsa vende si Gjermania mbështeten tradicionalisht në ombrellën bërthamore amerikane përmes NATO-s. Diskutimet për një kapacitet të përbashkët evropian po zhvillohen në një kohë kur angazhimi amerikan ndaj aleancës është vënë në pikëpyetje dhe disa shtete janë zotuar të rrisin shpenzimet e mbrojtjes deri në 5% të PBB-së deri në vitin 2035.
Ndërkohë, deklaratat e Trump për Groenlandën – të cilën ai e ka cilësuar jetike për sigurinë kombëtare të SHBA-së – kanë shtuar shqetësimet në Evropë. Kryeministrja daneze Mette Frederiksen pritet të takohet me Rubion për të diskutuar çështjen, që shumë liderë e konsiderojnë një pikë kthese në marrëdhëniet me Uashingtonin.
Në agjendën e konferencës përfshihen gjithashtu lufta në Ukrainë, tensionet me Kinën dhe mundësia e një marrëveshjeje të re bërthamore mes SHBA-së dhe Iranit. Presidenti ukrainas Volodymyr Zelensky deklaroi në Mynih se takimi mund të sjellë hapa të rinj drejt forcimit të sigurisë së Ukrainës dhe Evropës, ndërsa Rusia dhe Ukraina kanë paralajmëruar një raund të ri bisedimesh me SHBA-në në Gjenevë më 17-18 shkurt.
