Autoritetet franceze kanë arrestuar në qytetin e Amiens biznesmenin Ermal Beqiraj, 44 vjeç, i shpallur në kërkim ndërkombëtar nga autoritetet shqiptare në kuadër të hetimeve të SPAK.
Sipas Policisë së Shtetit, arrestimi u realizua falë bashkëpunimit mes Interpol Tiranës dhe Interpol Lion, pas shkëmbimit të informacioneve ndërmjet dy strukturave. Beqiraj u ndalua fillimisht nga Forcat Ajrore dhe të Hapësirës të Francës, të cilat më pas ia referuan rastin Xhandarmërisë Franceze.
Gjykata e Posaçme kundër Korrupsionit dhe Krimit të Organizuar i ka caktuar Beqirajt masën e sigurisë “Arrest në burg”. Ai akuzohet për heqje të paligjshme të lirisë, konkurrencë të paligjshme nëpërmjet dhunës, shkelje të barazisë së pjesëmarrësve në tendera publikë, grup të strukturuar kriminal dhe pastrim të produkteve të veprës penale.
Aktualisht, Beqiraj ndodhet në paraburgim në Francë. Ai pritet të dalë sot para Gjykatës Penale të Amiens, ku do t’i komunikohet zyrtarisht kërkimi ndërkombëtar ndaj tij, në funksion të procedurave për ekstradimin drejt Shqipërisë.
