Ndërsa kërkohej nga drejtësia shqiptare, Ermal Beqiri është arrestuar në Francë pasi avioni i lehtë që pilotonte fluturoi mbi një central bërthamor, duke ngritur alarmin te strukturat e sigurisë së vendit.
Ndalimi i tij është kryer në qytetin e Amiens, pas bashkëpunimit dhe shkëmbimit të informacionit ndërmjet Interpol Tiranës dhe autoriteteve franceze.
Beqiri kërkohej ndërkombëtarisht me urdhër të SPAK, ndërsa tashmë pritet t’i komunikohet masa e vendosur ndaj tij nga drejtësia shqiptare dhe të nisin procedurat për ekstradimin drejt Shqipërisë.
Rrethanat e arrestimit kanë rikthyer në vëmendje edhe një prej “fiksimeve” të shtrenjta të biznesmenit shqiptar: avionët dhe jahtet luksoze.
Nga avioni i lehtë që shkaktoi alarm pranë centralit bërthamor në Francë, te jahti “Skyfall” me vlerë rreth 930 mijë euro, mjetet luksoze kanë shoqëruar profilin e një prej personazheve kryesore të dosjes së AKSHI-t.
Jahti ishte regjistruar në emër të një shtetaseje rumune 24-vjeçare, por sipas SPAK kontrollohej realisht nga Beqiri dhe për këtë arsye është sekuestruar në kuadër të hetimit për pastrim parash.
Ermal Beqiri dhe Ergys Agasi konsiderohen nga hetuesit ndër emrat kyç të skemës së dyshuar që funksiononte prej vitesh në tenderët e Agjencisë Kombëtare të Shoqërisë së Informacionit.
Sipas SPAK, fituesit e procedurave dyshohet se paracaktoheshin, ndërsa fondet limit fryheshin për të kanalizuar paratë publike drejt kompanive të lidhura me personat që kontrollonin skemën.
Në qendër të hetimeve janë kompanitë “Soft & Solution” dhe “Horizon”, të lidhura me Beqirin, si dhe “EA Solution”, e lidhur me Ergys Agasin.
Në mekanizmin e dyshuar janë përfshirë edhe një numër biznesmenësh të tjerë, të cilët dyshohet se koordinonin ofertat, eliminonin konkurrencën reale dhe krijonin kushtet që kontratat të përfundonin te subjektet e paracaktuara.
Mbi Beqirin rëndojnë akuza për grup të strukturuar kriminal, pastrim parash, korrupsion dhe shkelje të barazisë në tendera, konkurrencë të paligjshme dhe heqje të paligjshme të lirisë.
Akuza e fundit lidhet me rrëmbimin e biznesmenit Gerond Meçe, ngjarje që SPAK e konsideron pjesë të veprimtarisë së grupit të dyshuar kriminal. /skyweb.al
