Çmimi i kontratës referencë të gazit natyror në Evropë kaloi të mërkurën pragun e 100 eurove për megavat-orë, niveli më i lartë që nga dhjetori 2022. Kontrata holandeze TTF arriti në 100.37 euro/MWh, me një rritje prej mbi 4% brenda ditës, krahasuar me rreth 32 euro para nisjes së luftës në Iran.
Komisioneri Evropian për Energjinë, Dan Jørgensen, paralajmëroi për një krizë të re energjetike dhe një dimër të vështirë për qytetarët dhe ekonominë evropiane.
Situata rëndohet nga ndërprerjet e furnizimit me gaz të lëngshëm natyror (LNG), veçanërisht nga Katari, si dhe nga rezervat e ulëta. Më 21 tetor, depot e gazit në BE ishin të mbushura vetëm në masën 75%, nën objektivin e zakonshëm prej 90% deri më 1 nëntor.
Sipas Agjencisë së BE-së për Bashkëpunimin e Rregullatorëve të Energjisë (ACER), lufta në Iran ka rritur faturën e importeve të gazit për Evropën me 18 deri në 33 miliardë euro.
Për të siguruar furnizimin, BE-ja po shqyrton një marrëveshje afatgjatë për LNG me Kanadanë, ndërsa ministrat evropianë të energjisë pritet të diskutojnë situatën të enjten. /skyweb.al
