Në tubimin vjetor të partisë së saj, kryeministrja italiane Giorgia Meloni e përmbylli fjalimin jo vetëm me thirrje për mbrojtjen e arritjeve të qeverisë, por edhe me një apel të drejtpërdrejtë drejtuar Europës që të forcojë kapacitetet e veta mbrojtëse. Kjo, sipas saj, është veçanërisht e domosdoshme në një kohë kur administrata e Donald Trumpit po jep sinjale për ndryshim të strategjisë së sigurisë dhe për një tërheqje të mundshme nga angazhimet në kontinentin europian.
Nga Castel Sant’Angelo në Romë, Meloni deklaroi se Trump e ka bërë të qartë synimin e Shteteve të Bashkuara për t’u distancuar nga Europa dhe se vendet europiane duhet të përgatiten për këtë realitet.
“Trump e ka pohuar me shumë vendosmëri se SHBA-të synojnë të shkëputen dhe europianët duhet të organizohen për të mbrojtur veten. Për tetëdhjetë vjet ia kemi besuar sigurinë tonë Shteteve të Bashkuara, duke u shtirur sikur ishte falas, por në të vërtetë kishte një çmim, dhe ai quhet kushtëzim. Liria ka një kosto,” u shpreh Meloni.
Deklaratat e saj vijnë në një moment tensionesh mes Bashkimit Europian dhe administratës Trump. Megjithatë, kryeministrja italiane hodhi poshtë pretendimet për një përçarje në marrëdhëniet mes SHBA-së dhe BE-së.
Pavarësisht kësaj, ajo përsëriti thirrjen për ndërtimin e një strukture mbrojtëse europiane më të fortë, e aftë të veprojë dhe të dialogojë me fuqitë globale në kushte të barabarta. /Skyweb.al
