Ish zv.kryeministri Arben Ahmetaj ka bërë një tjetër rrëfim të fortë publik për gazetarin Çim Peka në Syri TV.
Një ndër detajet që spikasin lidhet me atë që ai e cilëson si mekanizëm të mirëorganizuar për shpërndarjen e parave dhe kontrollin e narrativës mediatike, përmes kompanisë Gogel, në pronësi të Arbër Veliajt, vëllait të Erion Veliajt.
Ahmetaj deklaroi se çështja e kompanisë Gogel është përfshirë edhe në raportin e OSBE për zgjedhjet e vitit 2025, ku ajo përmendet si një agjenci shpërndarjeje reklamash me karakter të politizuar.
Sipas tij, roli i kësaj kompanie ka qenë kyç në orientimin e fushatave mediatike dhe në kanalizimin e fondeve publike drejt mbështetjes politike.
Gogel është pjesë e dosjes që lidhet me Erion Veliajn, pasi dyshohet se përmes kësaj kompanie është organizuar dhe orkestruar sulmi mediatik ndaj prokurorëve të SPAK që po hetonin çështjet e kryebashkiakut të Tiranës.
Gjithçka doli në dritë pas zbulimit të komunikimeve mes Erion Veliajt dhe vëllait të tij, Arbër Veliajt.
Në deklarimet e tij, Ahmetaj e cilësoi Erion Veliajn si “arkën” e parave të Edi Ramës, duke pretenduar se një pjesë e konsiderueshme e fondeve janë menaxhuar dhe shpërndarë përmes Bashkisë së Tiranës dhe rrjetit të kompanive të lidhura me të.
Kompania Gogel ka qenë një strukturë relativisht modeste deri në momentin kur Erion Veliaj u bë kryebashkiak i Tiranës.
Pas kësaj periudhe, kompania ka përfituar buxhete të jashtëzakonshme reklamash, të cilat janë përdorur për të blerë mbështetje mediatike dhe për të ndërtuar fushata sulmi ndaj prokurorëve të SPAK.
Deklaratat e Ahmetajt hapin një tjetër front të rëndë akuzash mbi mënyrën e përdorimit të fondeve publike, rolin e reklamës shtetëro dhe ndërhyrjen në proceset e drejtësisë, ndërsa institucionet përkatëse nuk kanë reaguar ende ndaj këtyre pretendimeve. /skyweb.al
