Kryeministri Edi Rama ka reaguar sërish lidhur me protestën e qytetarëve, e cila ka hyrë në ditën e saj të 25-të.
Kreu i qeverisë ka ndarë në rrjetet sociale një video dhe mesazhin e një qytetari me profilin “@mr.elprofe”, i cili thotë se ka tentuar të shohë realitetin shqiptar nga këndvështrimi i kryeministrit.
Në postimin e tij, qytetari shkruan se ka provuar “t’i veshë për pak çaste këpucët e kryeministrit”, jo për t’i bërë lajka apo për të bindur dikë, por për të kuptuar peshën e vendimmarrjes.
Ai thekson se Shqipëria ka ende probleme dhe se nuk mund të thuhet se gjithçka është perfekte, por shton se do të ishte naive të mohohej se në vend janë bërë edhe gjëra të mira.
“Unë nuk ha bukë nga shteti shqiptar që prej vitit 1997. Nuk jam as i shitur. As i blerë. Dhe nuk mbështes verbërisht askënd”, shkruan ai në mesazh.
Sipas tij, postimi është “një përpjekje për të parë anën tjetër të historisë” dhe një kundërrrymë ndaj asaj që dëgjohet çdo ditë.
Rama e ka shpërndarë këtë mesazh duke e cilësuar si një nga komunikimet e shumta të ditëve të fundit, të cilat sipas tij kanë qenë “të habitshme në të keq e në të mirë”.
“MIRËMËNGJES dhe me një nga mesazhet e shumta të këtyre ditëve të habitshme në të keq e në të mirë, të cilin dikush bujarisht e ka postuar e një tjetër miqësisht ma ka dërguar, ju uroj një ditë të mbarë”, shkruan Rama.
Reagimi vjen në një kohë kur protesta kundër qeverisë vijon prej 25 ditësh, ndërsa Kryeministri ka zgjedhur të përgjigjet edhe përmes mesazheve mbështetëse apo reflektuese të qytetarëve.
Edi Rama:
MIRËMËNGJES dhe me një nga mesazhet e shumta të këtyre ditëve të habitshme në të keq e në të mirë, të cilin dikush bujarisht e ka postuar e një tjetër miqësisht ma ka dërguar, ju uroj një ditë të mbarë
***
Ja profili i të panjohurit bujar që më çoi miku me statusin e postimit të videos
@mr.elprofe
Provova t’i vesh për pak çaste këpucët e kryeministrit.
Jo për t’i bërë lajka.
Jo për të bindur askënd.
Thjesht për të parë si do ta shihja unë botën në vendin e tij.
Jam rritur në një Shqipëri ku nuk bëje dot 200 metra pa t’u grisur këpucët.
Do të ishim naivë po të thoshim se nuk janë bërë edhe gjëra të mira.
Kjo nuk do të thotë se çdo gjë është perfekte.
As që nuk janë bërë gabime.
Por për sqarim:
Unë nuk ha bukë nga shteti shqiptar që prej vitit 1997.
Nuk jam as i shitur.
As i blerë.
Dhe nuk mbështes verbërisht askënd.
Kjo këngë është thjesht një përpjekje për të parë anën tjetër të historisë.
Një kundërrrymë ndaj asaj që dëgjojmë çdo ditë.
E di që do shahem.
Por s’ka problem.
Sepse në fund të fundit:
I shari shan.
I mençuri mendon.
