Agjencia Kombëtare e Ujësjellës-Kanalizimeve ka nisur një aksion në të gjithë vendin për kontrollin e lavazheve që furnizohen në mënyrë të paligjshme me ujë nga rrjeti publik.
Kontrollet kanë nisur pas përfundimit të afatit të vetërregullimit, më 31 tetor, gjatë të cilit subjektet kishin mundësi të rregullonin lidhjet dhe furnizimin me ujë.
Sipas AKUK-së, në të gjithë Shqipërinë janë identifikuar 1.206 lavazhe aktive, të cilat do të jenë në fokus të kontrolleve për mënyrën e furnizimit me ujë.
Nga këto, 460 subjekte kanë si aktivitet kryesor larjen e automjeteve, ndërsa 746 të tjera e ofrojnë këtë shërbim si aktivitet dytësor.
Autoritetet theksojnë se lidhjet e paligjshme në rrjetin e ujësjellësit shkaktojnë probleme të drejtpërdrejta në furnizimin e qytetarëve, pasi ulin sasinë dhe presionin e ujit që shkon drejt familjeve.
Një tjetër shqetësim lidhet me sigurinë e ujit të pijshëm, pasi ndërhyrjet e pakontrolluara në tubacione mund të shkaktojnë ndotjen e rrjetit dhe cenimin e cilësisë së ujit.
Drejtori i Përgjithshëm i AKUK-së, Fludian Çuka, u ka bërë thirrje bizneseve dhe individëve të ndërpresin lidhjet e paligjshme dhe të respektojnë rregullat për përdorimin e rrjetit publik.
Sipas tij, mbrojtja e infrastrukturës së ujësjellësit është e domosdoshme për garantimin e furnizimit të rregullt të banorëve.
Kontrollet do të realizohen në mënyrë sistematike nga të gjitha shoqëritë rajonale të ujësjellës-kanalizimeve, duke përfshirë lavazhet në qytete dhe zona të tjera të vendit.
AKUK bën të ditur se fillimisht synohet ndërgjegjësimi dhe respektimi i detyrimeve ligjore nga subjektet, por ndaj atyre që vijojnë të përdorin lidhje të paligjshme do të zbatohen masat e parashikuara në ligj.
Institucioni thekson se rrjeti publik i ujësjellësit është pasuri e përbashkët dhe çdo përdorim i paligjshëm i tij ndikon në cilësinë dhe vazhdimësinë e furnizimit me ujë për qytetarët. /skyweb.al
