Çmimi i Bitcoin ka rënë në nivelin më të ulët të 16 muajve të fundit, pavarësisht mbështetjes së hapur dhe personale të presidentit amerikan Donald Trump për kriptomonedhën.
Një Bitcoin u tregtua rreth 60 mijë dollarë, niveli më i ulët që nga shtatori i vitit 2024. Kjo rënie vjen pas një periudhe disa mujore rritjeje të fortë, gjatë së cilës kriptomonedha arriti një rekord historik prej mbi 122 mijë dollarësh në tetor 2025.
Gjatë kësaj periudhe, investitorët u nxitën nga përfshirja e drejtpërdrejtë e Trump në sektorin e kriptovalutave, mbështetja e tij publike dhe premtimet për lehtësimin e rregulloreve ligjore për industrinë.
Megjithatë, me rënien e kësaj jave, Bitcoin ka humbur rreth 32% të vlerës gjatë 12 muajve të fundit, duke iu afruar niveleve të regjistruara në fillim të viteve 2024 dhe 2021.
Edhe pse paqëndrueshmëria është karakteristikë e zakonshme e Bitcoin, analistët e lidhin rënien e fundit me emërimin e kryetarit të ri të Rezervës Federale të SHBA-së. Sipas tyre, pritshmëritë janë që ai të ndjekë një politikë monetare më “të ashpër”, duke mbajtur normat e interesit më të larta për më gjatë.
Një qasje e tillë zakonisht ul interesin e investitorëve për asete më të rrezikshme, si kriptovalutat, të cilat përfitojnë më pak në kushte të shtrëngimit monetar.
Bitcoin mbetet kriptomonedha më e madhe dhe më e njohur në botë, një formë e parasë dixhitale që funksionon pa kontrollin e një institucioni financiar të centralizuar.
