Aksidentet ajrore me avionë të regjistruar në Bashkimin Europian shkaktuan 116 viktima gjatë vitit 2025, ose 25 më shumë se 91 viktimat e regjistruara një vit më parë.
Por të dhënat e Eurostat tregojnë se pjesa dërrmuese e viktimave nuk lidhet me fluturimet e zakonshme të pasagjerëve.
Nga 116 viktima, 109 ose 94% humbën jetën në operacione jokomerciale, ku përfshihen kryesisht fluturimet private, sportive dhe rekreative. Në transportin ajror komercial u regjistruan vetëm katër viktima, nga tre në vitin 2024.
Tre viktima të tjera u regjistruan në operacione të specializuara, kundrejt pesë një vit më parë.
Sipas llojit të mjetit fluturues, avionët shkaktuan 79 viktima, nga 74 në vitin 2024. Numri i viktimave nga aksidentet me helikopterë u trefishua, nga gjashtë në 18.
Edhe aksidentet me avionë pa motor shkaktuan 18 viktima, nga dhjetë një vit më parë. Një viktimë u regjistrua nga aksidentet me balona, ndërsa nuk pati viktima nga sistemet ajrore pa pilot.
Të dhënat tregojnë se rritja e viktimave gjatë vitit 2025 u shkaktua pothuajse tërësisht nga aviacioni jokomercial dhe jo nga linjat e rregullta ajrore.
