Shifrat e fundit të INSTAT nxjerrin në pah përmasat e përqendrimit demografik në Tiranë, ndërsa pjesa më e madhe e vendit po përballet me rënie natyrore të popullsisë.
Në tremujorin e dytë të vitit 2026 në Shqipëri u regjistruan gjithsej 5,083 lindje, 3% më pak krahasuar me të njëjtën periudhë të vitit të kaluar.
Vetëm në qarkun Tiranë u regjistruan 2,310 lindje, ose mbi 45% e të gjitha lindjeve të vendit. Në 11 qarqet e tjera së bashku pati 2,773 lindje, vetëm 463 më shumë se Tirana e vetme.
Diferencat bëhen edhe më të forta nëse shihen qarqet veçmas. Gjirokastra regjistroi vetëm 66 lindje në tre muaj, ndërsa Tirana mbi 2,300.
Megjithatë, edhe kryeqyteti po jep sinjale të forta të rënies së lindshmërisë. Tirana regjistroi uljen më të madhe të lindjeve në vend, me 12%, krahasuar me tremujorin e dytë 2025. Në të kundërt, Dibra pati rritjen më të lartë, me 14.6%.
Panorama bëhet edhe më shqetësuese kur lindjet krahasohen me vdekjet. Nga 12 qarqe, vetëm pesë kishin më shumë lindje se vdekje, ndërsa në shtatë të tjerat bilanci natyror ishte negativ.
Tirana ishte qarku me bilancin më të mirë, me 1,033 lindje më shumë se vdekje, ndërsa Korça kishte rezultatin më negativ, me 265 vdekje më shumë se lindje.
Në rang kombëtar, diferenca mes lindjeve dhe vdekjeve ishte vetëm 218 persona, pasi përballë 5,083 lindjeve u regjistruan 4,865 vdekje.
Shifrat tregojnë se pa Tiranën panorama do të ishte krejt tjetër: 11 qarqet e tjera së bashku regjistrojnë 815 vdekje më shumë se lindje, ndërsa suficiti i madh i kryeqytetit është ai që e mban ende pozitiv bilancin natyror të Shqipërisë. /skyweb.al
