Furnizuesi i Shërbimit Universal, FSHU, do të ketë mundësi t’i kërkojë KESH-it shtyrjen e afatit të pagesës së faturave të energjisë në raste të veçanta, përfshirë situatat kur has vështirësi likuiditeti.
Mekanizmi i ri është përfshirë në ndryshimet e miratuara nga Enti Rregullator i Energjisë në kontratën e shitblerjes së energjisë mes KESH dhe FSHU për vitin 2026.
Sipas dokumentit, në rastet kur FSHU has vështirësi likuiditeti që e detyrojnë të kërkojë shtyrje pagese, ERE duhet të njoftohet, pasi një përsëritje apo përkeqësim i rasteve të tilla mund të ndikojë në qëndrueshmërinë financiare të modelit të shërbimit publik.
Për raste të veçanta, FSHU duhet t’i paraqesë KESH-it një kërkesë zyrtare dhe të arsyetuar jo më vonë se pesë ditë pune përpara datës së maturimit të faturës. Brenda të njëjtit afat duhet të njoftohet edhe ERE.
Nëse KESH miraton kërkesën, palët përcaktojnë një datë të re maturimi për faturën dhe pagesa nuk konsiderohet e vonuar deri në përfundimin e këtij afati të ri.
Ndryshimet në kontratë përcaktojnë gjithashtu se faturat mes KESH dhe FSHU do të paguhen brenda 45 ditëve nga data e lëshimit të faturës tatimore, afat që do të zbatohet edhe për faturat sistemuese.
ERE argumenton se marrëdhënia KESH–FSHU nuk është thjesht një marrëdhënie tregtare mes dy kompanive, por pjesë e mekanizmit për garantimin e furnizimit të klientëve të shërbimit universal, ndaj çdo problem i përsëritur me likuiditetin e FSHU-së duhet të monitorohet nga rregullatori. /skyweb.al
