Kontrolli i Lartë i Shtetit ka zbuluar probleme serioze në administrimin financiar të Bashkisë Fushë-Arrëz, ku detyrimet e paarkëtuara kanë arritur në mbi 302 milionë lekë, ndërsa masat për rikuperimin e tyre kanë rezultuar të pamjaftueshme.
Sipas raportit përfundimtar të auditimit financiar për vitin 2025, gjendja e llogarisë 468, e emërtuar “Debitorë të ndryshëm”, arriti në 302,275,408 lekë në fund të vitit, nga 298,885,945 lekë që ishte në fillim të tij.
Kjo do të thotë se gjatë vitit 2025 detyrimet për t’u arkëtuar janë rritur me rreth 3.4 milionë lekë, ose 1.13%, duke rënduar më tej situatën financiare të bashkisë.
Shuma totale e debitorëve përfaqëson rreth 71% të shpenzimeve vjetore të Bashkisë Fushë-Arrëz, të cilat gjatë vitit 2025 arritën në 428.2 milionë lekë.
Nga auditimi rezulton se gjatë vitit janë regjistruar detyrime të reja në shumën 5.28 milionë lekë, ndërsa pakësimet, ku përfshihen arkëtimet dhe sistemimet kontabël, kanë qenë vetëm 1.89 milionë lekë.
KLSH evidenton një nivel shumë të ulët të arkëtimit të të drejtave të konstatuara, duke bërë që detyrimet debitore të mbeten në nivele të larta.
Sipas audituesve, në fund të vitit 2025 këto detyrime përbënin 59.96% të aktiveve afatshkurtra dhe 17.71% të totalit të aktiveve të bashkisë.
Problematika bëhet edhe më serioze për faktin se niveli i lartë i debitorëve nuk është një fenomen i ri.
Kontrolli i Lartë i Shtetit thekson se kjo çështje është evidentuar edhe në auditimet e mëparshme, kur janë kërkuar masa konkrete për identifikimin e origjinës së detyrimeve dhe arkëtimin e shumave përkatëse.
Rekomandimet kanë përfshirë edhe ndjekjen e rrugëve gjyqësore për rikuperimin e detyrimeve, por sipas KLSH-së mungojnë veprimet korrigjuese nga administrata vendore.
Audituesit kanë konstatuar gjithashtu probleme me dokumentimin dhe pasqyrimin e detyrimeve në kontabilitet, përfshirë diferenca prej 5.25 milionë lekësh që kërkojnë sistemim.
Për këtë arsye, KLSH i kërkon Drejtorisë së Zhvillimit Ekonomik, Financës dhe Tatim-Taksave të bëjë evidentimin analitik të çdo debitori të mbartur, të verifikojë detyrimet dhe të korrigjojë pasaktësitë kontabël.
Një tjetër problematikë lidhet me administrimin e taksave dhe tarifave vendore, ku detyrimet e papaguara nga bizneset e vogla, bizneset e mëdha dhe institucionet shtetërore arrijnë në 30 milionë lekë.
Kjo shumë përbën një kategori të veçantë të detyrimeve tatimore që bashkia duhet të ndjekë për arkëtim.
KLSH ka kërkuar përdorimin e të gjitha instrumenteve ligjore për mbledhjen e detyrimeve, përfshirë bllokimin e llogarive bankare dhe vendosjen e barrëve siguruese mbi automjetet dhe pasuritë e paluajtshme të debitorëve.
Gjetjet e auditimit tregojnë se Bashkia Fushë-Arrëz vijon të përballet me probleme të përsëritura në administrimin e të ardhurave dhe ndjekjen e detyrimeve financiare, ndërsa rekomandimet e mëparshme të KLSH-së nuk kanë sjellë korrigjimin e situatës. /skyweb.al
