Europa po përballet me një valë ekstreme të të nxehtit, me temperatura deri në 12 gradë mbi mesataren sezonale.
Në Itali, Ministria e Shëndetësisë ka vendosur sot alarmin e kuq në 15 qytete, ndërsa nesër numri pritet të rritet në 16.
Situata është e rëndë edhe në Francë, ku 54 departamente janë vendosur në nivelin maksimal të alarmit, duke prekur rreth 38.8 milionë banorë.
Masat e ajrit të nxehtë vijnë nga Afrika e Veriut dhe kanë krijuar atë që meteorologët e quajnë “bllok omega”, një anticiklon që mban temperaturat shumë të larta mbi një pjesë të madhe të kontinentit.
Në Spanjë temperaturat kanë arritur deri në 45 gradë Celsius, ndërsa në Britaninë e Madhe priten rekorde të reja për muajin qershor.
Në Itali, vala e të nxehtit ka rritur ndjeshëm konsumin e energjisë, duke shkaktuar ndërprerje në zona të Torinos dhe Milanos.
Alarm ka edhe për lumenjtë, pasi lumi Po ka humbur rreth 60% të volumit vetëm brenda një jave.
Qeveria italiane ka rikthyer mundësinë që disa sektorë të reduktojnë ose pezullojnë punën për shkak të temperaturave ekstreme.
Sipas Organizatës Botërore të Shëndetësisë, gjatë katër viteve të fundit në Europë kanë humbur jetën mbi 200 mijë persona për shkaqe të lidhura me të nxehtin.
Ekspertët paralajmërojnë se vala e të nxehtit pritet të vazhdojë të paktën deri në fund të muajit.
