Ndërsa Evropa përballet me rregulla të reja hyrjeje për turistët, dy vende në rajonin e Ballkanit, Mali i Zi dhe Shqipëria po shfaqen si alternativa tërheqëse për pushime verore, falë procedurave më të thjeshta të hyrjes dhe mungesës së kërkesave për regjistrim biometrik, shkruan “Travel Off Path”. Shqipëria po tërheq gjithnjë e më shumë vëmendje për vijën e saj bregdetare dhe politikat fleksibël të udhëtimit.
Shqipëria, një alternativë në rritje në Mesdhe
Shqipëria, në jug të Malit të Zi, njihet për brigjet me ujëra të kristalta, plazhet me rërë të bardhë dhe qytetet historike.
Vendi po konsiderohet nga turistët si një alternativë më ekonomike krahasuar me destinacione të njohura si Greqia apo Italia.
Shumica e turistëve mbërrijnë fillimisht në kryeqytetin e Tiranës, i cili karakterizohet nga një ndërthurje arkitekturore unike.
Në Tiranë do të gjeni një xhami madhështore, parqe urbane të mëdha, ndërtesa të stilit brutalist dhe objekte të trashëgimisë komuniste, përfshirë edhe piramidën e ndërtuar si një monument dedikuar ish-diktatorit, Enver Hoxha.
Jashtë kryeqytetit, Shqipëria ofron një panoramë krejt tjetër.
Në veri shtrihen Alpet Shqiptare me fshatra të izoluar si Thethi, ndërsa në jug, zona si Dhërmiu dhe Ksamili ofrojnë plazhe që krahasohen shpesh me destinacionet tropikale.
Ksamil ka tërhequr gjithnjë e më shumë vizitorë ndërkombëtarë vitet e fundit, sidomos pasi Shqipëria u bë virale në rrjetet sociale për plazhet e saj parajsore dhe çmimet e përballueshme.
Akomodimet në bregdet fillojnë nga 30 dollarë – një kosto shumë më e lirë krahasuar me Amalfi ose Santorini.
Rregullat e hyrjes më të lehtësuara për turistët
Një nga avantazhet kryesore të Shqipërisë është fakti se nuk është pjesë e Bashkimit Evropian apo zonës Shengen.
Kjo do të thotë se turistët amerikanë mund të qëndrojnë deri në 365 ditë pa pasur nevojë për vizë apo leje qëndrimi.
Gjithashtu, vendi nuk aplikon sistemin e ri evropian të hyrje-daljeve (EES), i cili kërkon regjistrim biometrik, përfshirë gjurmët e gishtërinjve, për vizitorët në zonën Shengen.
Megjithatë, autoritetet kërkojnë që vizitorët të plotësojnë disa kushte bazë:
* Pasaportë e vlefshme të paktën 6 muaj pas datës së udhëtimit
* Të paktën një faqe bosh në pasaportë
* Provë për biletë kthimi ose udhëtimi të mëtejshëm (edhe pse kërkohet rrallë)
Sfidat e reja për udhëtimet në Evropë
Ndërkohë, sistemi i ri EES në zonën Shengen ka shkaktuar vonesa dhe konfuzion në disa pika kufitare dhe aeroporte evropiane.
Turistët duhet të regjistrohen, përpara kontrollit të pasaportës, duke krijuar radhë të gjata dhe vonesa.
Në këtë kontekst, destinacione si Shqipëria po shihen si alternativa tërheqëse për pushime verore, duke ofruar jo vetëm bukuri natyrore dhe çmime të përballueshme, por edhe procedura më të thjeshta hyrjeje.
